Կենտրոնական բանկը թողարկել է նոր հուշադրամ

• 30.03.2015, 12:23
•  Հայաստան

https://www.cba.am/AM/News/Pages/news_30-12-14_4.aspx

Հայաստանի Հանրապետության կենտրոնական բանկը թողարկել է Մայր Աթոռ Սուրբ Էջմիածնում պահվող Սրբալույս Մյուռոնի կաթսային նվիրված հուշադրամ:

Հուշադրամի դիմերեսին պատկերված է ՀՀ զինանշանը: Զինանշանից ներքև հուշադրամի անվանական արժեքն է` «1000 դրամ» և «REPUBLIC OF ARMENIA» մակագրությունը, իսկ աջ եզրագծով ուղղահայաց մակագրված է «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ»:

Հուշադրամի դարձերեսին պատկերված է Սրբալույս Մյուռոնի կաթսան: Վերևի եզրագծով «ՍՈՒՐԲ ԷՋՄԻԱԾԻՆ HOLY ETCHMIADZIN» մակագրություններն են և «Է» տառը: Ներքևի եզրագծով մակագրված են «ՍՐԲԱԼՈՒՅՍ ՄՅՈՒՌՈՆԻ ԿԱԹՍԱ», «CAULDRON FOR HOLY CHRISM», թողարկման տարեթիվը` «2014, ՌՆԿԳ» և նախշ:

 Հուշադրամի անվանական արժեքը 1000 դրամ է: Մետաղը և հարգը` արծաթ 9250: Քաշը 5,0 գ է, չափը`27,0 x 47,0 մմ, որակը՝ պրուֆ, դրամաշուրթը՝ ատամնավոր, տպաքանակը՝ մինչև 2500 հատ: Հուշադրամը հատվել է Գերմանիայի «Մայեր» դրամահատարանում: