Ցեղասպանության միջազգային կոնվենցիան հերքում է Թուրքիայի պնդումները

• 26.04.2015, 11:15
•  Մերձավոր Արևելք

Հայոց ցեղասպանության ճանաչման պատմական պահը հեռու չէ,  եգիպտացի պատմաբան, գիտնական և միջազգային իրավունքի մասնագետ Այմամ Սալամայի խոսքերն է մեջբերում NEWS.am-ը։  Գիտնականը նշել է, որ երկրորդ անգամ է ժամանում Հայաստան։ «Ես իմ խորին ցավակցություններն եմ հայտնում հայ ժողովրդին, Օսմանյան կայսրությունում Առաջին համաշխարհային պատերազմի տարիներին Ցեղասպանությունից տուժած հայ ընտանիքներին»,- ասել է Այմամ Սալաման։

Մասնագետի կարծիքով՝ ՄԱԿ 1948թ. կոնվենցիայի 1-ին հոդվածով ցեղասպանությունը միջազգային հանցագործություն է անկախ նրանից` դա կատարվել է պատերազմական, թե խաղաղ իրավիճակներում։ «Հետևաբար, դա փաստացի շատ հստակ և անվիճելի կերով հերքում է թուրքական կողմի պնդումները։ Եթե Դուք հարցնեք իրավաբաններին, փաստաբաններին, մարդու իրավունքների պայքարի ակտիվիստներին, նրանց 90 տոկոսը կասի, որ Հայոց ցեղասպանությունը տիպիկ ցեղասպանություն էր, ինչպես դա որակում է միջազգային իրավունքը, միջազգային հումանիտար իրավունքը և Ժնևի կոնվենցիան»,- ընդգծել է Սալաման՝ հավելելով, որ թուրքական կառավարությունը պետք է ուղերձ հղի ոչ թե հայ, այլ սեփական ժողովրդին, որպեսզի նրանք հասկանան, թե իրականում ինչ է եղել։