Էժան հեռախոսազրույցներ ԵՄ տարածքում

• 01.07.2015, 20:15
•  Եվրոպա,  ԵԱՏՄ,  Աշխարհ,  No-politics

Եվրոպական միությունն՝ ի դեմս իր գլխավոր կառույցների՝ ԵՄ խորհրդի, Եվրոպական հանձնաժողովի և Եվրոպական խորհրդարանի որոշել է վերացնել ռոումինգի վճարը մոտակա երեք տարվա ընթացքում՝ մինչ 2018 թվականը։

 «ԵՄ սահմաններում ճամփորդությունների ժամանակ բջջային հեռախոսների բաժանորդները կվճարեն նույն գինը, ինչ տանը՝ առանց որևէ հավելավճարի»,- նշված է Եվրահանձնաժողովի հաղորդագրության մեջ, փոխանցում է Euronews-ը:

 Սակայն համապատասխան օրինագիծը պետք է վերջնականորեն հաստատվի Եվրախորհրդարանի և ԵՄ խորհրդի լիագումար նիստում։

 Ըստ նախնական որոշման սակայն, ռոումինգը միայն հարաբերականորեն անվճար կդառնա: Հեռախոսազրույցի ժամանակահատվածի համար հատուկ սահմանափակումներ կներմուծվեն՝ հնարավոր չարաշահումներից խուսափելու նպատակով։ Իսկ եթե բաժանորդն այնուամենայնիվ գերազանցի ժամանակը, ապա ստիպված լինի «սիմվոլիկ վճարում» կատարել:

 Հետաքրքիր է, որ օրեր առաջ ընդամենը նմանատիպ հայտարարութոուն էր տարածել նաև ԵԱՏՄ հակամենաշնորհային և մրցակցությունն ապահովող հանձնաժողովի մշտական անդամ Նուրլան Ալդաբերգենովը:

«Եվրասիական տնտեսական միության երկրների միջև չպետք է ռոումինգային փաթեթ գործի: Այն պետք է չեղարկենք մինչ հոկտեմբեր ամիսը», - այս մասին հաղորդում է Коммерсант-ը՝  մեջ բերելով Ալդաբերգենովին:

Իսկ եթե բջջային օպերատորները հրաժարվեն այդ պայմանները կատարելուց, ապա նրանք կկասկածվեն հակամենաշնորհային օրենսդրությունը խախտելու մեջ: Իսկ օպերատորների մեծ մասը, հատկապես հայտնի ռուսական ընկերություններն արդեն իսկ բողոքում են նման նախագծի դեմ և որպես իրենց դժգոհության պատճառ նշում են ռուբլու անկումը:

Արդեն երկու տարի է, ինչ ԵԱՏՄ-ում գնում են ռոումինգը չեղարկելու մասին նմանատիպ խոսակցություններ: Պատճառն այն է, որ ռոումինգի գները ԵԱՏՄ տարածքում չափազանց բարձր են, ինչը բերում է մեծ թվով բաժանորդների կորստի:

Նշենք, որ հիմա արդեն իսկ մոնիտորինգ ու տարբեր հետազոտություններ են անցկացվում ԱՊՀ տարածքում՝ ռոումինգի հետ կապված չարաշահումները պարզելու և դրանց դիմացն առնելու նպատակով: