«Թրղի-3» ՀԷԿ-ը պատրաստ է գործարկման

• 24.07.2015, 20:12
•  ԼՂՀ

Ինչպես ներկայացրեց հանձնաժողովի Հանրային ծառայությունների կարգավորման բաժնի պետ Անդրեյ Մուսայելյանը, «Թրղի-3» հէկ-ի դրվածքային հզորությունը կազմում է 5 մեգավատ, էլեկտրաէներգիայի տարեկան արտադրությունը՝  16,33 միլիոն կիլովատ/ժամ, իսկ ագրեգատների քանակը 2  է: Այս մասին հայտնում է Արցախպրեսը:

Զեկուցողը նշեց, որ հանձնաժողովի կողմից դրական որոշումից հետո, Արցախում գործող փոքր հէկ-երի քանակը կհասնի 10-ի, որոնց ընդհանուր դրվածքային հզորությունը կազմելու է 34,8 մեգավատ, իսկ էկեկտրաէներգիայի տարեկան միջին արտադրանքը՝ 179,649 մլն կիլովատ/ ժամ:

Էլեկտրաէներգիայի արտադրության նման ծավալները կբավարարեն ԼՂՀ ներքին պահանջարկի 93 տոկոսը:

Ինչպես նկատեց հանձնաժողովի նախագահ Լևոն Մնացականյանը, ըստ կանխատեսումների, «Թրղի-3»-ի և առաջիկայում նախատեսվող ևս մեկ փոքր հէկ-ի գործունեության լիցենզիայի տրամադրմամբ  Արցախի բոլոր  հէկ-րի հզորությունը հնարավորություն կընձեռի բավարարել հանրապետության էլեկտրաէներգիայի ներքին պահանջարկի 100 տոկոսը: ՀԾՏՄԿՊ հանձնաժողովի որոշումն ուժի մեջ է մտնում ստորագրման պահից՝ 15 տարի ժամկետով:

Հանձնաժողովի մյուս որոշմամբ՝   բավարարվել է «Ջրմուղ-կոյուղի» ՓԲԸ-ի՝ ջրային համակարգի օգտագործման թույլտվության գործողության ժամկետը երկարաձգելու հայտը, ըստ որի, այդ ժամկետը երկարաձգվել է մինչև մինչև 2018 թվականի օգոստոսի 17-ը:

Այնուհետև, նիստի օրակարգի համաձայն, քննարկվել ու միաձայն որոշմամբ հաստատվել են «Օմեգա Գրուպ» ՍՊԸ-ին` Լեռնային Ղարաբաղի Հանրապետության տարածքում ռադիոկապի ցանցի (շարժական) կազմակերպման համար 159,900ՄՀց ռադիոհաճախականությունը տրամադրելու հայտը, ինչպես նաև 103.0ՄՀց և 104.3ՄՀց հաճախականությամբ   Ստեփանակերտ քաղաքի և միաժամանակ մեկ կամ մի քանի շրջանների տարածքում  ընդհանուր ուղղվածության ռադիոհաղորդումների եթերային հեռարձակման լիցենզավորման մրցույթներ հայտարարելու մասին հարցը: