Վրացական կառավարության նոր՝ եվրասիական վեկտորը

• 02.09.2015, 19:40
•  Տարածաշրջան

Վրաստանի վարչապետ Իրակլի Ղարիբաշվիլին հայտարարել է, որ երկրի եվրոպական ընտրությունը երբեք չի վերանայվի:

«Այս ընտրությունը կատարվել է մեր մեծ նախնիների կողմից: Ուստի, ոչ միայն մեր, այլ նաև որևէ այլ կառավարություն դա չի կարող վերանայել»,- հայտարարել է Ղարիբաշվիլին:

Նշենք, որ վարչապետի նման հավաստիացումների անհրաժեշտություն է առաջացել նորանշանակ արտգործնախարար Գեորգի Կվիրիկաշվիլիի՝ իր պաշտոնում արված առաջին հայտարարության հետ կապված:

Կառավարության նիստին, երբ վարչապետը ներկայացրել է նրան՝ որպես նոր արտգործնախարար, Կվիրիկաշվիլին հանդես է եկել հայտարարությամբ, որում մասնավորապես ասել է.

«Աշխարհում բացի արևմտյան ուղղությանից շատ հետաքրքիր բաներ են տեղի ունենում: Դա Արևելքի հետ կապերն են, Եվրասիական մայրցամաքի վերջին իրադարձություններն են: Մենք պետք է փորձենք առավելագույնս տրանսֆորմացնել այդ հետաքրքիր երևույթները Վրաստանի համար՝ քաղաքական և տնտեսական տեսանկյունից»,- նշել է Գեորգի Կվիրիկաշվիլին:

Կվիրիկաշվիլիի հայտարարությունը, մասնավորապես՝ Եվրասիական տարածքում առկա հնարավորություններից օգտվելու անհրաժեշտության դրույթը շատ ընդդիմադիր ուժերի կողմից բացասական ընդունելության արժանացավ, քանզի դա ասոցացվեց Եվրասիական տնտեսական միության հետ համագործակցությանը:

Վրաստանի վարչապետն այս առնչությամբ փորձել է պարզաբանում տալ՝ շեշտելով, որ հնարավորություններ առկա են ողջ Եվրասիական մայրցամաքում:

«Անշուշտ ուժի մեջ է մնում մեր գլխավոր խնդիրը՝ եվրաինտեգրումը և ընթացքը դեպի ՆԱՏՕ, սակայն դրան զուգահեռ պետք է շարունակել խորացնել հարաբերությունները Չինաստանի, Ասիայի և Մերձավոր Արևելքի երկրների հետ: Կարծում եմ դա ճիշտ ուղղություն է»,- հայտարարել է Վրաստանի վարչապետը:

Կարող ենք ենթադրել, որ վրացական հանրային և քաղաքական շրջանակներում եվրասիական ուղղության հետ առկա մտավախությունները պայմանավորված են այն հանգամանքով, որ վերջին շրջանում Վրաստանի՝ եվրասիական ինտեգրման անհրաժեշտության մասին առավել հաճախ են բարձրաձայնում: Որոշ ընդդիմադիր ռուսամետ ուժեր անգամ այցեր են կազմակերպում Մոսկվա, ինչը բավական  բացասական է ընկալվում եվրոպամետների կողմից: Ավելին,  վերջերս ամերիկյան NDI ընկերության կողմից անցկացված հանրային կարծիքի ուսումնասիրության արդյունքները ցույց են տվել, որ Վրաստանի բնակչության 31%-ի համար ընդունելի է Վրաստանի անդաակցությունը ԵԱՏՄ, ինչը բավական լուրջ ցուցանիշ է: