Հայաստանը պետք է Սիլիկոնային հովիտ դառնա. Ադամ Շիֆ

• 03.05.2016, 14:03
•  Ամերիկա,  Հայաստան

ԱՄՆ կողմից Հայաստանին տրամադրվող տնտեսական և ռազմական աջակցության ընդլայնումը բխում է երկու երկրների շահերից: Այս մասին հայտարարել է ամերիկացի կոնգրեսական, հետախուզության հարցերով հանձնաժողովի անդամ Ադամ Շիֆը, հաղոդրում է «Ամերիկայի ձայնը»: 

Նրա խոսքով, վերջին ժամանակներս Հայաստանը Ռուսաստանի լուրջ ազդեցության տակ է հայտնվել, որը բնավ դրական ազդեցություն չի կարելի համարել:

Ադամ Շիֆի կարծիքով Հայաստանի շահերից է բխում զարգացնել սերտ հարաբերություններ ինչպես ԱՄՆ-ին, այնպես էլ Ռուսաստանի հետ:

«Միացյալ Նահանգների հետ հարաբերությունները կարող են տարբեր ուղղություններով զարգանալ, այդ թվում կարող ենք շարունակել նախկինում իրականավող ծրագրեր, ինչպիսիք էին «Հազարամյակի մարտահրավերների» կորպորացիայի, ԱՄՆ արտաքին օգնության և ականազերծման ծրագրերը: Մենք պետք է նաև Ադրբեջանին հանգիստ չտանք, և թույլ չտանք նրանց շփման գծում սադրանքների դիմել»,-ասել է նա:

Շիֆի կարծիքով Հայաստանի շահերից է բխում կոռուպցիայի դեմ պայքարը, տնտեսության զարգացումը և Հայաստանիպայծառ բնակչության համար երկրի ներսում զբաղվածության ապահովումը: «Ես ամենից շատ կցանկանայի, որ Հայաստանը դառնար Կովկասի Սիլիկոնային հովիտ և գրավեր ամբողջ ինտելեկտուալ ներուժը, քանի որ ինտելեկտուալ կարողություններն անհնար է շրջափակման ենթարկել, հետևաբար բարձր տեխնոլոգիաների ոլորտը շատ հեռանկարային է Հայաստանի համար»,-ընդգծել է կոնգրեսականը:

Անդրադառնալով ԱՄՆ կողմից Հայաստանին հատկացվող աջակցությանը, նա ընդգծել է, որ այն կշարունակվի, չնայած ամերիկյան բյուջեի կրճատումներին: Շիֆը նաև կարծիք է հայտնել, որ հայկական սփյուռքը պետք է ակտիվորեն մասնակցի երկրի ապագայի կերտմանը: «Հայաստանում մեծ ազդեցություն վայելող սփյուռքի համար հատկապես կարևոր է նպաստել, որ հայաստանը ժողովրդավարական ուղիով շարժվի»,-իր խոսքն է ամփոփել Ադամ Շիֆը: