Արա Քոչունյան. ռազմական հեղաշրջման փորձից հետո թուրք-ամերիկյան հարաբերություններում փոփոխություններ տեղի կունենան (ԲԱՑԱՌԻԿ)

• 16.07.2016, 20:30
•  Տարածաշրջան,  Աշխարհ,  Հարցազրույց

bantuhd.blogspot.com

«Զարմանալով կարող եմ ասել, որ Թուրքիան ահավոր գիշերվանից հետո արթնացավ բավականին նորմալ: Զինվորական հեղաշրջման փորձը կասեցվել է, և իշխանություններն այժմ ամեն ինչ վերահսկում են երկրում: Ստամբուլում խանութներն արդեն բաց են, մարդիկ գործի են գնում, հանրային փոխադրամիջոցները մեծամասամբ աշխատում են», - այս մասին«Արմեդիա» ՏՎԳ հետ զրույցում նշեց Թուրքիայի «Ժամանակ» օրաթերթի գլխավոր խմբագիր Արա Քոչունյանը` խոսելով ռազմական հեղաշրջման փորձից հետո Թուրքիայում տիրող իրավիճակի մասին:

Անդրադառնալով հեղաշրջման փորձի պատճառներին՝ Քոչունյանը նշեց, որ երկար ժամանակ է արդեն, ինչ Թուրքիայի իշխանություններն ահազանգում էին ահաբեկչական գործողությունների, ինչպես նաև «Զուգահեռ կառույց» խմբավորման հնարավար գործողությունների մասին, մասնավորապես՝ երկրին նրանց հնարավոր հասցնելիք վնասի կամ երկրում հնարավոր անկարգություններ սկսելու մասին: «Այդ կանխատեսումները, դժբախտաբար, երեկ գիշերն իրականացան: Թուրքիայում եղավ զինվորական հեղաշրջման փորձ, որը կանխվեց, և ողջ աշխարհն ականատես եղավ, թե Թուրքիայի ժողովուրդը՝ լսելով նախագահ Էրդողանի կոչը, ինչպես փողոց դուրս եկավ, ինչպես լցրեց երկրի մեծ քաղաքների հրապարակներն ու պողոտաները և տեր կանգնեց երկրի ժողովրդավարության համակարգին», - նշեց Քոչունյանը:

«Ժամանակ» օրաթերթի գլխավոր խմբագրի խոսքով հետևանքները բավականին ծանր են և երեկ գիշերվանից հետո Թուրքիան այժմ դիմավորում է մի նոր քաղաքական ժամանակաշրջան, ինչը երկրի ներքաղաքական  հավասարակշռության վրա անմիջական ազդեցություն կգործի: «Դեպքերի հենց առաջին րոպեներից սկսած ընդդիմադիր բոլոր կուսակցությունները, անգամ պետք է ասեմ՝ շտապել են երկրի իշխանություններին իրենց զորակցությունը հայտնել», - նշեց Քոչունյանը՝ հավելելով, որ մինչև մոտ անցյալ բավականին բևեռացված ներքաղաքական հարաբերություններ ունեցող Թուրքիայում այժմ իրավիճակ է փոխվել:

«Ինձ թվում է, որ Թուրքիայի արտաքին քաղաքականության մեջ էլ որոշ փոփոխություններ տեղի կունենան, մասնավորապես՝ թուրք-ամերիկյան հարաբերություններում: Առաջիկա ժամանակաշրջանում մենք կարող ենք հետաքրքիր իրադարձությունների ականատես լինել: Թուրքիայի ԶԼՄ-երը երեկ գիշերվանից արդեն տեղեկացնում էին, որ ԱՄՆ նախագահ Բարաք Օբաման իրազեկված է բոլոր իրադարձություններից, պետքարտուղար Ջոն Քերին, ով գտնվում է Մոսկվայում, երեկ գիշերն արդեն հեռախոսազրույց է ունեցել Թուրքիայի արտգործնախարար Մեվլութ Չավուշօղլուի հետ: ԱՄՆ իշխանությունները բոլոր մակարդակներով իրենց աջակցությունն են հայտնել Թուրքիային: Չի բառառվում, որ թուրքական կողմն այդ զորակցության համատեքստում մի շոշափելի բան պահանջի ԱՄՆ-ից, քանի որ երկար ժամանակ է արդեն, ինչ Թուրքիան ակնկալում է «Զուգահեռ կառույցի» ղեկավարի արտահանձնում ԱՄՆ-ից: Այդ պահանջները կարող են նորից սկսել բարձրաձայնվել»: