Թուրքիայում Գյուլենի հետ կապ ունենալու կասկածանքով փակվել է հայ բժշկին պատկանող կլինիկան

• 27.07.2016, 19:32
•  Տարածաշրջան,  Աշխարհ

hastanetelefonadres.com

Թուրքիայում հայտարարված «արտակարգ դրության» շրջանակներում փակվել է հայ բժշկին պատկանող արհեստական բեղմնավորմամբ և կանանց առողջապահությամբ զբաղվող «İstanbul Tüpbebek» կլինիկան:  Այս մասին հաղորդում է Ermenihaber-ը՝ հղում կատարելով թուրքիայի հայկական «Ակոս» թերթի կայքին:  

Կայքի տեղեկացմամբ՝ կլինիկայի բաժնետոմսերի 61.5%-ը պատկանում է նրա հիմնադիր, ազգությամբ հայ, դավանանքով` քրիստոնյա Արետ Քամարին:

Նշվում է, որ հուլիսի 25-ին կլինիկան ենթարկվել է աուդիտորական ստուգման, որից հետո եզրակացվել է, որ կլինիկան կապ ունի «զուգահեռ կառույցի» (Գյուլենական համայնքի) հետ, ինչի հիման վրա  որոշում է կայացվել կենտրոնը փակելու մասին:

«Մենք այդ կառույցի հետ որևէ կապ ունենալ չենք կարող, սակայն կլինիկայի փակման որոշումը կայացրել է կառավարությունը, հետևաբար մենք ոչ դատարան կարող ենք դիմել, ոչ էլ փաստաբանները կարող են օգնել», - «Ակոս»-ի հետ զրույցում հայտնել է Արետ Քամարը: