Արցախում հանրային քննարկումներով ամփոփվում է սահմանադրական բարեփոխումների հայեցակարգը

• 28.07.2016, 18:48
•  ԼՂՀ

nankr.am

Հայեցակարգի նախագծի հանրային քննարկումների շրջանակներում ԼՂՀ նախագահին կից սահմանադրական բարեփոխումների մասնագիտական հանձնաժողովը հուլիսի 28-ին եզրափակիչ հանդիպումն է անցկացրել Արցախում գործող հասարակակական կազմակերպությունների, երիտասարդական կառույցների ներկայացուցիչների ու լրագրողների մասնակցությամբ: Հանդիպմանը հրավիրված էր նաև ԼՂՀ Մարդու իրավունքների պաշտպանը, տեղեկացնում է ԼՂՀ ԱԺ մամուլի ծառայությունը:

Մասնագիտական հանձնաժողովի նախագահ Աշոտ Ղուլյանը ներկայացրել է հայեցակարգի բաժինները՝ մասնավորապես ուշադրություն հրավիրելով մարդու և քաղաքացու հիմնական իրավունքների ու ազատությունների, ինչպես նաև կառավարման համակարգ գլուխներում առկա թերությունների և առաջարկվող փոփոխությունների վրա:

ԼՂՀ ոչ կառավարական կազմակերպությունների ղեկավարները տեսակետներ ներկայացրեցին առաջարկված թեմաներով՝ արտահայտելով որոշ մտահոգություններ պետական ու տեղական ինքնակառավարման համակարգերի թերացումների մասին: Քննարկման ընթացքում մասնակիցների ելույթներն ու առաջարկությունները մեծամասամբ վերաբերում էին կառավարման այնպիսի մոդելի ընտրությանը, որը պետք է երաշխավորի Արցախի անվտանգությունն ու ներքաղաքական կայունությունը: Այս առումով նախապատվությունը ուժեղ ու կենտրոնաձիգ, ներքին ցնցումներից զերծ կառավարման համակարգի օգտին էր:

Եզրափակելով հանդիպումը՝ Աշոտ Ղուլյանը նշել է, որ հայեցակարգի տարբեր ձևաչափերով քննարկումների անցկացումը նպատակ ուներ վեր հանել հանրային շրջանակների դիտողություններն ու առաջարկությունները սահմանադրական բարեփոխումների հայեցակարգի վերաբերյալ, այդ թվում՝ կառավարման մոդելի վերջնական ընտրության հարցում:

Մասնագիտական հանձնաժողովն առաջիկա օրերին  կամփոփի հանրային քննարկումների արդյունքները և հայեցակարգը կներակայցնի հանրապետության նախագահին: