Թուրքիայում Հայոց ցեղասպանություն չկա, փոխարենը կա «Հայի դիակի պես ծանր» արտահայտությունը. թուրք սյունակագիր

• 16.01.2017, 16:14
•  Տարածաշրջան,  Աշխարհ

Türkbeleni Gazetesi

Թուրք թատերագետ և սյունակագիր Հիլալ Նեսինը Թուրքիայի խորհրդարանի հայազգի պատգամավոր Գարո Փայլանի՝ ցեղասպանություն բառի գործածման համար խորհրդարանի առաջիկա 3 նիստին մասնակցելու իրավունքից զրկվելուց հետո, Twitter-ի իր էջում գրառմամբ հեգնել է Թուրքիայում ցեղասպանությունը հերքողներին, փոխանցում է Tert.am-ը:

Հիլալ Նեսինի գրառումը՝ ստորև.

«Թուրքիայում Հայոց ցեղասպանություն չկա, փոխարենը կա «Հայի դիակի պես ծանր» արտահայտությունը:

Թուրքիայում Հայոց ցեղասպանություն չկա, փոխարենը երկրի ամբողջ տարածքում կան հայերի կառուցած դպրոցները, եկեղեցիները, ալրաղացները...

Թուրքիայում Հայոց ցեղասպանություն չկա, փոխարենը մեկ դար շարունակ հայերի թաղած ոսկիները փնտրող միլիոնավոր մարդիկ կան:

Հայ լինելու համար սպանված Հրանտ Դինքը կա, անմեղ տեղը բանտ նետված Սևան Նիշանյանը (գրող, մտավորական) կա, բայց հայկական կոտորած չկա:

Այս գրությունը գրելուս համար քիչ անց ինձ անձնական նամակով «Վայ դու հայի սերմ, հայի բիճ» գրողներ կլինեն, սակայն հայկական կոտորած չկա:

Սովորե՛ք ապրել առանց կեղծիքի: 

Հարցրե՛ք ինքներդ ձեզ. «Առանց կոտորածի ապրած գոնե մեկ տարի ունե՞նք»: