Իրանում հայուհին ճանաչվել է տարվա բուժքույր

• 16.02.2017, 12:07
•  Տարածաշրջան,  Աշխարհ,  Սփյուռք

Norjugha.ir

Սպահանի «Ալ-զահրա» ուսուցման և բժշկական կենտրոնի (ICU) բաժանմունքում  աշխատող հայ բուժքույր Անահիտ Փիլոսյանը, Սպահանի հիվանդապահության համակարգի կազմակերպության (سازمان نظام پرستاری) կողմից ճանաչվել է որպես  իրանական 1395 թվականի (մեկնարկել է 2016 թվականի մարտի 20-ին) օրինակելի բուժքույր` մասնագիտական բարձր հմտությունների, հիվանդների նկատմամբ ցուցաբերած հոգատարության և աշխատանքում դրսևորած  պարտաճանաչության ու բծախնդրության համար, գրում է panorama.am-ը: 

Անահիտ Փիլոսյանը ծնվել է 1976 թվականին, Ահվազում, ուր և ապրել է մինչև իր ամուսնանալը` 2000 թվականը: Նա իր դպրոցական կրթությունն ստացել է Ահվազի հայոց ազգային «Քարուն» տարրական և «Րաֆֆի» ուղեցույց և  պարսկական «Եֆաթ» միջնակարգ դպրոցներում:

Այնուհետև ընդունվել է  Ահվազի Ազատ համալսարան: Նա աշխատանքի է անցել «Ալ-զահրա» հիվանդանոցում` 2001 թվականից և մինչև օրս անդամակցում է Սպահանի հիվանդապահության համակարգի կազմակերպությանը: