Սիրիացի փախստականները Թուրքիայում ստիպված են լինում վաճառել իրենց ներքին օրգանները

• 21.02.2017, 19:01
•  Տարածաշրջան,  Աշխարհ

Al Jazeera

Թուրքիայում գտնվող սիրիացի փախստականները հաճախ ստիպված են լինում վաճառել իրենց ներքին օրգաններն, այդ երկրում որևէ կերպ գումար աշխատելու հնարավորությունից զրկված լինելու պատճառով:

Գերմանական ARD պետական հեռուստաընկերության կողմից պատրաստված  ռեպորտաժում խոսվում է այն մասին, որ  իրենց ներքին օրգանները վաճառել ցանկացող փախստականները գնորդներ են փնտրում համացանցում, փոխանցում է  Ermenihaber-ը՝ հղում կատարելով թուրքական «Demokrathaber.net» կայքին:  

Ռեպորտաժը պատրաստողները, համացանցում տեղադրված հայտարարություններից մեկի հետքերով գնալով, գտել են Ահմեթ անունով մի սիրիացի փախստականի: Նա պատմել է հետևյալը. «Ես թուրքերեն չգիտեմ, ծանոթներ չունեմ, աշխատանք չունեմ, տուն չունեմ: Երիկամս վաճառում եմ, քանի որ ունեցածս խնդիրները լուծելու համար փող գտնելու այլ տարբերակ չունեմ»:

Նշվում է, որ տեղական «շուկայում» օրգաններ կարելի է գտնել 6-11 հազար դոլարով, իսկ օրգանների պատվաստմամբ զբաղվող մարդիկ դրանք առաջարկում են 30 հազար դոլարի սահմաններում: