Թուրքիայում դատի են տվել Էրդողանին` ժողովրդի շրջանում ատելություն սերմանելու համար

• 22.02.2017, 10:46
•  Տարածաշրջան,  Մերձավոր Արևելք,  Աշխարհ

Getty Images

Թուրքիայի Աշխատավորական կուսակցությունը դատական հայց է ներկայացրել երկրի նախագահ Ռեջեփ Թայիփ Էրդողանի, վարչապետ Բինալի Յըլդըրըմի, ինչպես նաև «Ազգայնական շարժում» կուսակցության առաջնորդ Դևլեթ Բահչելիի դեմ: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber-ը:

Կուսակցությունը նրանց մեղադրել է «ժողովրդի ներսում անհանգստություն, վախ և խուճապ առաջացնելու նպատակով սպառնալու», «ժողովրդին ատելության և թշնամանքի դրդելու կամ նվաստացնելու մեջ»: Որպես մեղադրանքների ապացույց է բերվել այն փաստը, որ Էրդողանը, Յըլդըրըմն ու Բահչելին հայտարարում են, թե սահմանադրական հանրաքվեում «ոչ» քվեարկողները կորակվեն որպես «ահաբեկիչներ», «հայրենիքի դավաճաններ», «անջատողականներ», «հեղաշրջման կողմնակիցներ»: