Իրենց որդիներին կորցրած թուրք մայրերը հարգել են Հայոց ցեղասպանության զոհերի հիշատակը

• 23.04.2017, 09:20
•  Տարածաշրջան,  Աշխարհ

News.am

Ստամբուլի Գալաթասարայի հրապարակում ապրիլի 22–ին «Շաբաթ օրվա մայրերը» հարգել են 1915–ի Ցեղասպանության ժամանակ զոհ գնացած մտավորականների հիշատակը։

Ինչպես փոխանցում է News.am-ը` հղում կատարելով թուրքական Evrensel–ին Գալաթասարայի հրապարակում հավաքված  «Շաբաթ օրվա մայրերը»  ձեռքներին պահել են 1915–ին կոտորված հայ մտավորականների ու իրենց կորցրած որդիների նկարները՝ դատապարտելով պետության կողմից իրականացվող կոտորածները։

1980-ին Թուրքիայում տեղի ունեցած  հեղաշրջումից հետո ավելի քան 2000 մարդ է  անհետ կորել: Նմանատիպ դեպքերն իրենց գագաթնակետին են հասել 1990-ական թվականներին` Քուրդիստանի բանվորական կուսակցության (PKK) և թուրքական անվտանգության ուժերի միջև երեք տասնամյակ ընթացող  հակամարտության ամենից լարված ժամանակահատվածում: Ներկայումս անհետ կորածների հարցով հետաքննությունները դադարեցված են և ոչ մի տեղեկատվություն չի տրամադրվում նրանց մասին: Ժամանակ առ ժամանակ մահացածների դիեր են հայտնաբերվում:

Նշենք, որ իրենց հարազատներին անհայտ հանգամանքներում կորցրած մայրերը 1995–ի մայիսի 27–ից  պարբերաբար շաբաթ օրերը ակցիաներ են իրականացնում Ստամբուլի Գալաթասարայի հրապարակում՝ պահանջելով բացահայտել իրենց որդիների սպանության գործում մեղավորներին։