Իրաքի թուրքմենները ցանկանում են «արյուն թափե՞լ» և Քիրքուքը քրդերից վերցնե՞լ

• 11.10.2017, 15:47
•  Մերձավոր Արևելք,  Աշխարհ

Ermenihaber

Թուրքմենները թույլ չեն տա, որ Քիրքուքը մնա իրաքյան քրդերի ձեռքում: Այս մասին հայտարարել է Իրաքի  շիական «Հաշդի Շաբի» խմբավորման կազմում կռվող թուրքմենների ջոկատի  հրամանատար Յըլմազ Նեջջարը:

Ինչպես փոխանցում է Ermenihaber-ը՝ Նեջջարը Բաղդադում  թուրքական «Dogan haber» գործակալության հետ զրույցում խոսել է իրենց հետագա անելիքների և նպատակների մասին: Նա մասնավորապես ասել է, որ Քիրքուքը քրդերի ձեռքից վերցնելու  համար իրենք պատրաստ են «արյուն թափել»:

Նա ասել է, որ Քիրքուքում համապատասխան միջոցառումներ ձեռնարկելու հարցում  իրենք բանակցությունների մեջ են Իրաքի կենտրոնական իշխանությունների հետ:

Խոսելով թուրքմենների և Թուրքիայի միջև հարաբերությունների մասին, նա մասնավորապես ասել է.

«Մենք Թուրքիային համարում ենք մեր մերձավորը, որովհետև մենք էլ, իրենք էլ թյուրք ենք: Այդ տեսանկյունից ակնկալում ենք անհրաժեշտ օգնություն ստանալ: Մասնավորապես ցանկանում ենք այնպիսի օգնություն ստանալ, որով կկարողանանք վերահսկողության տակ վերցնել սահմանները: Այստեղի նավթային պաշարներում մենք ունենք մեր բաժինը, սակայն ոչ մի բան չենք ստանում: Բնական է, որ մենք օգնություն ենք խնդրելու Թուրքիայի զինված ուժերից»:

Նշենք, որ ներկայում նավթային պաշարներով հարուստ Քիրքուքը մտնում է իրաքյան Քուրդիստանի կազմում, որտեղ սեպտեմբերի 25-ին անկախության հանրաքվե էր անցկացվել: