Թուրքիայի նախագահը հայտարարել է, թե վերանորոգել է հայկական եկեղեցիները, սակայն դրանք ավերակների են վերածված

• 13.11.2017, 14:10
•  Տարածաշրջան,  Աշխարհ

24СМИ

Թուրքիայի նախագահ Ռեջեփ Թայիփ Էրդողանը Ստամբուլում մշակութային ժառանգության թեմայով մի միջոցառման ժամանակ անդրադարձել է հայկական եկեղեցիների վերանորոգման նախագծերին:

Ինչպես փոխանցում է News.am-ը՝ հղում կատարելով թուրքական Diken պարբերականին, Էրդողանը հայտարարել է, թե իր կուսակցության ղեկավարման տարիներին Թուրքիայում իրականացվել է 250 պատմական ու հոգևոր շինությունների վերանորոգում։

«Օրինակի համար շեշտեմ, որ վերանորոգվել է Էդիռնեի սինագոգը, Դիարբեքիրի հայկական բողոքական և կաթոլիկ եկեղեցիները։ Մեր պապերն այդպես էին անում։ Հիմա էլ մենք ենք այդպես անում»,-ասել է Էրդողանը։

Նշենք, որ Էրդողանի շեշտած Դիարբեքիրի հայկական բողոքական ու կաթոլիկ եկեղեցիներն այս պահին ավերակ վիճակում են։ Թեև դրանք որոշ չափով վերանորոգվել էին, սակայն թուրքական զինուժերը քրդերի դեմ պայքարի ժամանակ թիրախավորել էին հայկական եկեղեցիները և ավերակների են վերածել դրանք։