Ադրբեջանից հեռացել է մոտ 660 հազար հայ. փախստականների հարցերով համակարգող

• 13.01.2018, 21:27
•  Տարածաշրջան,  Աշխարհ,  Հայաստան

1990 թվականի հունվարի 13-ից 19-ը Բաքվում տեղի ունեցած ջարդերը Ցեղասպանության ակնհայտ դրսևորում էին: Այս մասին հունվարի 13-ին լրագրողների հետ հանդիպման ժամանակ ասել է փախստականների հարցերով համակարգող Մարիամ Ավագյանը, փոխանցում է News.am-ը: 

Նրա խոսքով՝ Բաքվում տեղի ունեցած իրադարձությունների վերաբերյալ ահռելի քանակությամբ փաստաթղթեր կան, որոնք վկայում են հայ բնակչության նկատմամբ բռնության դրսևորումների մասին:

«Այս մասին բազմիցս գրել են նաև արտասահմանյան լրատվամիջոցները, ինչպիսին են «Ազատության ձայնը», New-York Times-ը, «Իզվեստիան» և այլն»,- պարզաբանել է Ավագյանը՝ դժգոհելով, որ Հայաստանի քաղաքական ղեկավարությունը համապատասխան քարոզչական աշխատանք չի կատարում տարբեր խոշոր միջազգային կազմակերպություններում այդ իրադարձությունները պատշաճ ներկայացնելու համար: Նա նշել է, որ Բաքվի ջարդերի զոհերի ճշգրիտ թվի մասին տվյալներ չկան, սակայն որոշ գնահատականներով՝ Բաքվի ջարդերի ժամանակ սպանվել է մոտ 9 հազար մարդ, իսկ Սումգայիթում 700-ից ավելի:

Ավագյանը նաև հիշեցրել է, որ այս կամ այն երկրի ներկայացուցիչների` Բաքու պաշտոնական այցերի ժամանակ նրանք պարտավոր են այցելել «Շեհիդների» ծառուղի, որտեղ թաղված են հայկական ջարդերի կազմակերպիչները: Նա կոչ արեց ավելի մեծ ակտիվություն հանդես բերել՝ ուղղված այն բանին, որ Ադրբեջան այցելող տարբեր երկրների ներկայացուցիչները զերծ մնան այդ ծառուղի այցելելուց, ինչպես դա ժամանակին արել են Ռուսաստանի և Շվեյցարիայի նախագահները:

Դրանից զատ, նրա գնահատմամբ՝ 1988 թվականից սկսած և 1990 թվականին Խորհրդային Ադրբեջանից հեռացել է մոտ 660 հազար հայ: