Լրատվամիջոցներում բարձրացված աղմուկն է փրկել Ադրբեջանում գաղտնի ձերբակալված ռուսաստանցի գիտնականի կյանքը.Լապշին

• 16.01.2018, 18:32
•  Տարածաշրջան,  Աշխարհ

Լրատվամիջոցներում բարձրացված աղմուկը փաստացիորեն փրկել է Ադրբեջանում գաղտնի ձերբակալված ռուսաստանցի գիտնական Դմիտրի Չուլկովի կյանքը։ Այս մասին գրել է բլոգեր Ալեքսանդր Լապշինը, փոխանցում է News.am-ը:

«Սեփական փորձից իմանալով, թե ինչպես են աշխատում ադրբեջանական ուժայինները, կասեմ հետևյալը՝ այն նավթի եկամուտների և իշխանության համար պայքարող կլանների և ընտանիքների երկիր է: Սրան ավելացրած ձգձգված Ղարաբաղյան հակամարտությունն, որի հետ կապված է լրտեսությունը, տարբեր պաշտոնյաների ցանկությունը ծառայել և շողոքորթել ղեկավարին՝ պաշտոնի բարձրացման հույսով։ Լրատվամիջոցներից հայտնի է,որ Դիմա Չուլկովին ձերբակալել են Գյոլգյոլ լճի մոտ։ Սա լեռնային գեղեցիկ տեղ է, որը երկար ժամանակ ռազմական արգելված տարածք է համարվում՝ Լեռնային Ղարաբաղի ռազմաճակատային գծի մոտիկության (10 կիլոմետրից պակաս) պատճառով։ Լրատվամիջոցները գրել են, որ նա մտել է արգելված գոտի և չի ենթարկվել պահակախմբին։ Լավ իմանալով ադրբեջանական ուժայիններին՝ կարող եմ ասել, որ, ըստ երևույթին, մարդը ուղղակի զբոսնել է այդ տարածքով և լուսանկարել։ Հնարավոր է՝ նրան նկատել է մի զինվոր, որը, հուսալով մոտակա շաբաթվա ընթացքում արձակուրդ ստանալ, որոշել է զգոնություն ցուցաբերել և սկսել է գոռգռալ, օգնություն կանչել։ Չուլկովն էլ շրջվել է և հեռու գնացել։ Մյուս զինվորները հարցրել են, թե ինչ է պատահել, օգնություն կանչող զինվորն էլ հայտարարել է թե տեսախցիկով լրտես կա։ Եվ քանի որ զբոսաշրջիկը չէր կարող փախչել, այլ ընդամենը մի փոքր հեռու գնալ, նրան բռնել են։ Ամեն ինչ շատ պարզունակ է, հավատացեք։ Այնտեղ վաղուց պրոֆեսիոնալներ չկան»-նշել է Լապշինը։

Նա հավելել է նաև, որ նրանք պետք է անմիջապես կապ հաստատեին Ռուսաստանի դեսպանատան հետ, բայց չեն արել։ «Պետք է նրան թույլ տային տուն զանգահարել, չեն թույլատրել: Քաղաքացու, իսկ մասնավորապես այլ երկրի քաղաքացու իրավունքերը կոպտորեն ոտնահարվել են։ Եվ եթե չլիներ լրատվամիջոցներում բարձրացված աղմուկը, տղան կարող էր հավետ անհետանալ»,-շեշտել է բլոգերը։