Ռազմական շքերթ ԱՄՆ-ում. ո՞ւմ է ցանկանում նմանվել Թրամփը

• 21.02.2018, 14:50
•  Ամերիկա,  Աշխարհ

RT

Դեռ հունվարի վերջին ԱՄՆ նախագահ Դոնալդ Թրամփը ցանկություն էր հայտնել Վաշինգտոնում ռազմական շքերթ անցկացնել, քանի որ «անչափ տպավորված էր մնացել Փարիզում Բաստիլի գրավման օրվան նվիրված շքերթից»: Իսկ փետրվարի 7-ին ամերիկյան մամուլը գրեց, որ Թրամփն արդեն հանձնարարել է սկ:սել շքերթի նախապատրաստական աշխատանքները:

Սպիտակ տան մամուլի քարտուղար Սառա Սանդերսն այսպես է մեկնաբանել Թրամփի այս քմահաճ ցանկությունը. «Նախագահ Թրամփը ամեն կերպ աջակցում է ամերիկացի զինծառայողներին, որոնք ամեն օր վտանգում են իրենց կյանքը՝ ապահովելու համար ԱՄՆ-ի անվտանգությունը»:

Վաշինգտոնում նման շքերթներ սովորաբար անցկացվում են որևէ ռազմական հաղթանակի կապակցությամբ: Վաշինգտոնում վերջին ռազմական շքերթը տեղի է ունեցել 1991թ. Բուշ Ավագի օրոք՝ ի նշան Ծոցի առաջին պատերազմի ավարտի և Քուվեյթի ազատագրման:

Առհասարակ արևմտյան երկրներում նման իրադարձությունները չափազանց հազվադեպ են հանդիպում: «Ռազմական շքերթ» հասկացությունն ամենից շատ այսօր ասոցացվում է Հյուսիսային Կորեայի հետ: Նման շքերթները հաճախակի բնույթ են կրում նաև Ռուսաստանում, Չինաստանում, Հնդկաստանում և Պակիստանում: Օրինակ, Ռուսաստանում 2015թ. մեծ շուքով նշվեց Հաղթանակի օրը, որի տոնակատարություններն ուղեկցվեցին մեծ ռազմական շքերթով: Իսկ Հյուսիսային Կորեան իր յուրաքանչյուր անցկացրած ռազմական շքերթն անվանում է «պատմության մեջ մեծագույնը»:

Դեմոկրատները խիստ անհանգստացած են ԱՄՆ-ի նախագահի այս ցանկությամբ: Նրանք հայտարարել են, որ շքերթը չափազանց ծախսատար է. վերոնշյալ շքերթն ԱՄՆ-ում 1991թ.-ին արժեցել է 8 մլն դոլար: Սակայն, դեմոկրատներին ամենից շատ անհանգստացրել է շքերթի խորհրդանշական ենթատեքստը: Նրանք հայտարարել են, որ ռազմական շքերթի անցկացման գաղափարը հիշեցնում է ավտորիտար ռեժիմի ղեկավարության պահվածք:

ԱՄՆ-ի քաղաքացիները ևս անհանգստացած են նախագահի այս որոշմամբ. նրան հասցրել են համեմատել ինչպես Հյուսիսային Կորեայի առաջնորդ Կիմ Չեն Ընի, այնպես էլ ԽՍՀՄ ղեկավարների հետ, ովքեր բազմիցս քննադատվել են ԱՄՆ-ի կողմից՝ ռազմական հզորության ցուցադրության համար:

Ինչևէ, Թրամփը հաստատակամ է իր որոշման մեջ: The Washington Post-ի հաղորդմամբ՝ ռազմական շքերթը կարող է անցկացվել Վետերանների օրվա կամ Անկախության օրվա առթիվ: