ԱՄՆ-ը Ղարաբաղյան հակամարտության կարգավորման հարցում կարևորում է կողմերի շրջանում անկեղծ ջանքերի առկայությունը

• 07.03.2018, 13:37
•  Ամերիկա,  Աշխարհ,  Հայաստան,  ԼՂՀ

Armenian News By MassisPost

Մինսկի խմբի ԱՄՆ համանախագահ Էնդրյու Շոֆերը նշել է, որ ԱՄՆ-ն  աջակցում է խնդրի բանակցային կարգավորման գործընթացին և այս հարցում ԵԱՀԿ Մինսկի խմբի համանախագահի դերում շարունակում է ակտիվ փոխգործակցությունը կողմերի հետ, հայտնում է Armenpress-ը:

«ԱՄՆ երկարաժամկետ քաղաքականությունը, որը կիսում են նաև Մինսկի խմբի համանախագահները, կայանում է նրանում, որ արդար կարգավորումը պետք է հիմնվի միջազգային իրավունքի սկզբունքների վրա՝ ներառյալ Հելսինկիի եզրափակիչ ակտը և ուժի ու ուժի սպառնալիքի չկիրառման դրա հիմնարար սկզբունքները, տարածքային ամբողջականությունը և ինքնորոշման իրավունքը: Մենք համոզված ենք, որ գոյություն ունեցող ստատուս-քվոն չի կարող երկարաժամկետ հեռանկարում պահպանվել, սակայն հիմնախնդրի կարգավորումը չունի ռազմական ճանապարհ»,- նշել է նա:

«Մենք շարունակելու ենք նպաստել նրան, որ նախագահներն ու արտգործնախարարները հանդիպեն հնարավորինս շուտ՝ հանուն առանցքային հարցերի շուրջ քննարկումների վերսկսման՝ հաշվի առնելով հրադադարի ռեժիմի պահպանման և 2017 թվականին Ժնևում, իսկ 2016 թվականին Վիեննայում և Սանկտ Պետերբուրգում ընդունված քայլերի իրականացման կարևորությունը»,- ասել է համանախագահը:

Անդրադառնալով ԵԱՀԿ գործող նախագահի անձնական ներկայացուցչի գրասենյակի ընդլայնման հարցին՝ նա ընդգծել է, որ դա կարևոր քայլ կլինի, որը կապացուցի կողմերի հանձնառությունը սահմաններին լարվածության թուլացման հարցում:

Շոֆերը Ղարաբաղյան հակամարտության կարգավորման հարցում կարևորել է կողմերի շրջանում անկեղծ ջանքերի առկայությունը: Առաջիկայում տարածաշրջան այցի վերաբերյալ նա որևէ տեղեկություն չի հաղորդել՝ նշելով, որ այդ հարցում գրաֆիկը դեռ հստակ չէ և պայմանավորված է տարածաշրջանում առկա ընտրական գործընթացներով: