Դիոգո Պինտոն հրաժարական է տվել «Հայաստանի եվրոպացի բարեկամներ»-ի տնօրենի պաշտոնից

• 19.03.2018, 13:43
•  Եվրոպա,  Աշխարհ,  Հայաստան

eufoa.org

Ափսոսանքով, սակայն նաև հպարտության և երախտագիտության զգացումով, «Հայաստանի եվրոպացի բարեկամներ» («EuFoA») միջազգային հասարակական կազմակարպությունը հայտարարում է, որ Դիոգո Պինտոն հրաժարական է տվել կազմակերպության տնօրենի պաշտոնից և կդադարեցնի իր գործառույթները կազմակերպությունում մարտի 31-ից` սկսելով իր գործունեության հերթական փուլը` որպես ԵԽ պատգամավոր Մարիա Ջոաո Ռոդրիգեսի քաղաքական հարցերով խորհրդատու:

«Միջազգային եվրոպական շարժում» և «Եվրոպական երիտասարդական ֆորում» կազմակերպությունների նախկին գլխավոր քարտուղար Դիոգո Պինտոն ստանձնել էր «EuFoA»-ի տնօրենի պաշտոնը 2016 թ. սեպտեմբերից` կազմակերպության համար բարդ ժամանակահատվածում` նպատակ ունենալով իր ղեկավարության ներքո  ձևավորել ուժեղ և դինամիկ բրյուսելյան թիմ, որի վերստին մեկնարկած գործունեությունն ուղղված կլինի ԵՄ-Հայաստան կապերի ուժեղացմանն ու ԵՄ քաղաքական դաշտում կազմակերպության դիրքերի ամրապնդմանը:

Ավելի քան մեկ ու կես տարվա ընթացքում պարոն Պինտոն ոչ միայն հասավ այդ նպատակին, այլև կարողացավ նպաստել կազմակերպության գործունեությանը տարաբնույթ մեթոդներով, որոնք երբեք չեն մոռացվի:

«Ես երախտապարտ եմ և երջանիկ, որ հնարավորություն ստացա աշխատել «EuFoA»-ի համար և նպաստել հայկական խնդիրների բարձրացմանը Բրյուսելում. ինձ համար դա պատիվ էր և առավելություն: Թեև ոգևորված եմ սպասվելիք նոր մարտահրավերների կապակցությամբ, սակայն, ցավով եմ լքում «EuFoA»-ն և գործընկերների այս թիմը: Հպարտ եմ մոտ մեկ ու կես տարվա ընթացքում գրանցած արդյունքներով և ես ուշիուշով կհետևեմ կազմակերպության հետագա ձեռքբերումներին ու հաջողություններին: Ես միանշանակ կմնամ «Հայաստանի եվրոպացի բարեկամ», իսկ Հայաստանի և Արցախի իմ ընկերները կարող են ինձ միշտ համարել իրենց բարեկամն ու աջակիցը»,- նշել է պարոն Պինտոն:

Մենք` «Հայաստանի եվրոպացի բարեկամներս», կշարունակենք առաջ գնալ ապագայի հետ կապված նոր նախաձեռնություններով: «EuFoA»-ի թիմը մեծապես երախտապարտ է պարոն Պինտոյին կազմակերպությանը բերած իր նպաստի համար և մաղթում է հաջողություն նոր պաշտոնում: Մենք ակնկալում ենք սերտ համագործակցություն պարոն Պինտոյի հետ: