Օսմանյան կայսրության 36 սուլթաններից 35-ի մայրերը թուրք չեն եղել. թուրք վերլուծաբան

• 29.03.2018, 17:29
•  Տարածաշրջան,  Աշխարհ

ThoughtCo

Թուրք հայտնի վերլուծաբան Ռահմի Թուրանը, անդրադառնալով օտարազգի կնոջ հետ ամուսնանալու համար թուրք քաղաքական գործիչներից մեկին ուղղված քննադատություններին, հիշեցրել է օսմանյան սուլթանների մայրերի մասին, որոնք բնավ թուրք չեն եղել:

Ինչպես փոխանցում է Ermenihaber-ը՝ Թուրանը «Փադիշահի մայրերը» վերնագրով հոդվածում «Saadet» կուսակցության նախագահ Թեմել Քարամոլլաօղլուին անգլիացի կնոջ հետ ամուսնանալու համար քննադատողներին հիշեցրել է, որ Օսմանյան կայսրության 36 սուլթաններից 35-ի մայրերը թուրք չեն եղել:

Հոդվածում մասնավորապես ասվում է.

«Իշխանամետ մամուլի կողմից ամեն անգամ կարոտախտով հիշատակվող օսմանյան շրջանի 36 փադիշահերից (սուլթան) 35-ի մայրերն ունեցել են ռուսական, հայկական, հրեական, հունական, ֆրանսիական, սերբական, լեհական ու անգլիական ծագում:

Նրանցից ոմանք նույնիսկ իրենց կրոնը չեն փոխել: Սկսած օսմանյան առաջին սուլթան Օսմանից՝ բոլոր փադիշահերը անտերբերություն են ցուցաբերել թուրք կանանց նկատմամբ:

Այդ պատճառով օսմանյան փադիշահերի արյան մեջ անընդհատ օտար արյուն է եղել:

Պատմական այս հետաքրքիր փաստը ցույց է տալիս, որ թուրքական տարրը դարեր շարունակ կառավարվել է այլազգի կանանցից ծնված փադիշահերի կողմից:

Համակարգչային հատուկ ծրագրով արված հաշվարկները ցույց են տալիս, որ Օսմանյան կայսրության վերջին սուլթան Մուհամմեդ 4-րդ Վահիդեդդինի երակներում հոսած թուրքական արյունը կազմել է 0.6 տոկոս:

Իսկ թե ինչու են սուլթանները թուրք կանանց փոխարեն նախընտրել օտար կանանց, դա արդեն այլ ուսումնասիրության նյութ է»: