Վրաստանում այսուհետ կապահովվի հայերեն և ադրբեջաներեն առցանց հեռուստահեռարձակում. Ռամիլյա Ալիևա

• 29.04.2018, 23:55
•  Տարածաշրջան,  Աշխարհ

mygeotrip.com

Մայիսի 3-ից «Բազմազան Վրաստանը» նախագծի շրջանակում Վրաստանի հանրային հեռարձակման կայքում կգործի բացառապես հայերեն լեզվով թողարկվող նորությունների, ծրագրերի 12-ժամյա հեռարձակման ռեժիմը։ Այս մասին Sputnik Արմենիային է ասել Վրաստանի հանրային հեռուստաալիքի գլխավոր տնօրենի օգնական Ռամիլյա Ալիևան։

«Մայիսի 3-ից ՎՀՀ-ի կայքում «Բազմազան Վրաստանը» նախագծի շրջանակում առավոտյան ժամը 10-ից մինչև կեսգիշեր ապահովվելու է հայերեն և ադրբեջաներեն առցանց հեռուստա- և ռադիոհեռարձակում», - ասել է Ալիևան։

Նախագծի յուրաքանչյուր տարբերակի համար առանձին խումբ է աշխատելու։ Հայերեն խմբում այս պահին 8 մասնագետ կա։ 12-ժամյա հեռարձակման ռեժիմում կցուցադրվեն տարբեր ծրագրեր, այդ թվում` երիտասարդների համար, կլինի նաև նորությունների թողարկում։

Հայերեն և ադրբեջաներեն նորությունները յուրաքանչյուր ժամը մեկ կհեռարձակվեն Վրաստանի հանրային հեռուստաալիքի առանձին հարթակում։ Ուշադրություն է դարձվելու բոլոր տոներին և միջոցառումներին, որոնք տոնում է Վրաստանի հայ համայնքը։ Այսուհետև դրանք ցուցադրվելու են առցանց ռեժիմում։