Արցախը դեմ չէ, որ Հայաստանն ու Ադրբեջանը հարաբերությունները բարելավեն, սակայն անընդունելի է Արցախն Ադրբեջանի մաս ճանաչելը, ինչը կբերի կամ պատերազմի, արյունահեղության, ցեղասպանության կամ Արցախի հայաթափման: «Արմենպրես»-ի հաղորդմամբ՝ նման տեսակետ հայտնեց Արցախի Հանրապետության արտաքին գործերի նախարար Դավիթ Բաբայանը ՀՀ ազգային ժողովում լրագրողների հետ ճեպազրույցում:
Ըստ Բաբայանի՝ Հայաստանն ու Ադրբեջանը կարող են ճանաչել միմյանց տարածքային ամբողջականությունը, սակայն անպայման պետք է ֆիքսվի, որ դա Արցախի վրա չի տարածվում: Բաբայանի խոսքով՝ դա կարող է նշվել առանձին կետով կամ կարող է նշվել, որ պետք է այդ հարցը հետո քննարկել: «Պետք է ֆիքսենք ու ասենք, որ երբեք Արցախը չի կարող լինել Ադրբեջանի կազմում: Մեզ համար շատ կարևոր է, որ այդ փիլիսոփայությունը՝ լինի կետի միջոցով, լինի քաղաքականությամբ արտահայտված, լինի շատ հստակ»,-ասաց Արցախի ԱԳ նախարարը:
Նա նշեց՝ չկա փաստաթուղթ, որտեղ նշված լինի, թե Արցախն Ադրբեջանի կազմում է, և, թե Հայաստանը հրաժարվում է: Հետևաբար, կարևորեց հայության միասնականությունը:
Արցախի նախագահի գլխավորած պատվիրակությունը արդեն 3-4 օր է՝ Երևանում է: Դավիթ Բաբայանը հայտնեց, որ այս օրերի ընթացքում տարբեր հանդիպումներ են ունեցել: Հոկտեմբերի 13-ին հանդիպել են Հայաստանի անվտանգության խորհրդի քարտուղարի հետ, հոկտեմբերի 14-ին՝ ԱԺ նախագահի հետ, օրվա ընթացքում նախատեսված է նաև հանդիպում ՀՀ նախագահի հետ: Հոկտեմբերի 15-ին նախատեսված է հանդիպում ՀՀ վարչապետի և ԱԳ նախարարի հետ:
Նա շատ կարևորեց, որ Հայաստանն ու Արցախը միշտ ունենան կայուն կապ, այդ թվում՝ կառույցների մակարդակով: «Շատ ազնիվ ձևով քննարկել ենք ամենաբարդ հարցերը: Մեզ համար շատ կարևոր է նաև այն, որ Արցախի պարագայում ունենանք հստակ դիրքորոշում»,-նշեց Արցախի ԱԳ նախարարը: