Այսօր կեսգիշերին Ուկրաինայի նախագահ Պ. Պորոշենկոն, ինչպես եւ ինքնահռչակ Դոնեցկի և Լուգանսկի առաջնորդները հանդես են եկել ուղերձով` հայտարարելով հրադադրի ռեժիմի մեկնարկի մասին:
Չնայած դրան, Դոնեցկի ինքնահռչակ հանրապետության ներկայացուցիչների հավաստիացմամբ, ուկրաինական բանակի զինված գործողությունների եւ հրետակոծությունների պատճառով իրենք ստիպված են եղել պատասխան կրակ բացել:
Դոնեցկի պաշտպանության նախարարության ներկայացուցիչ Էդուարդ Բասուրինը մասնավորապես նշել է. «Հանրապետության ղեկավարության արտահերթ խորհրդակցության ընթացքում քննարկվել է Դեբալցևոյի իրավիճակը: Ուկրաինայի կողմից խախտվել է հրադադրի ռեժիմը: Դոնեցկի բնակավայրերում շարունակում են զոհվել խաղաղ բնակիչներ: Դոնեցկի ստորաբաժանումները ստիպված են եղել պատասխան կետային կրակ բացել` կիևյան ազգայնականների եւ դիվերսանտների մնացորդներին ճնշելու համար»:
Ավելի վաղ տեղեկատվություն էր հայտնվել այն մասին, որ «Աջ սեկտորի» երկու գումարտակ, խախտելով հրադադարը, գործողություններ են սկսել Դեբալցևոյի մոտ: Այդ մասին ազգայնականների առաջնորդ Դմիտրի Յարոշը հաղորդագրություն էր գրել, որը տեղադրվել էր Ուկրաինայի ազգային գվարդիայի էլեկտրոնային կայքում, սակայն շուտով հաղորդագրությունը հեռացվել էր էջից: Յարոշի հայտարարության մեջ մասնավորապես նշված է եղել, որ «գումարտակները լավ զինված և հանդերձավորված են» և, իբրեւ թե, «մարտական լուրջ հաջողություններ ունեն»: Հաղորդագրությունն ի հայտ է եկել մի քանի ժամ անց այն բանից հետո, երբ Ուկրաինայի նախագահ Պ. Պորոշենկոն հրաման է արձակել Դոնբասում դադարեցնել զինված գործողությունները` մինսկի փետրվարի 12-ի համաձայնություններին համապատասխան:
Ավելի վաղ, սակայն, Յարոշը հայտարարել էր, թե իր շարժումը չի ընդունում Մինսկում ձեռք բերված պայմանավորվածությունները և շարունակելու է զինված գործողությունները`«ուկրաինական հողը լիովին ազատագրելու համար»:
Չնայած այս ամենին Է. Բասուրինը նշել է, որ հրադադրն ընդհանուր առմամբ պահպանվում է:
Մյուս կողմից, կեսգիշերին հայտարարելով հրադադարի ռեժիմի մեկնարկի մասին, Դոնեցկի ինքնահռչակ հանրապետության ղեկավար Զախարչենկոն նշել էր, թե անկախ հրադադարից Դեբալցևոյում շրջափակված շուրջ 8 հազ. ուժայիններին հեռանալու հնարավորություն չի տրվի: «Մենք կկանխենք շրջափակումը ճեղքելու ցանկացած փորձ: Ես արդեն համապատասխան հրահանգ եմ տվել»,- նշել է Զախարչենկոն: Վերջինիս խոսքով, Դեբալցևոյին Մնսկի փաստաթուղթը չի առնչվում: