ԱՄՆ Նաբրասկա-Լինքոլն համալսարանում տեղի կունենա երկօրյա գիտաժողով "100-ամյակի անցում. Հայոց ցեղասպանության պատմագրության վերագնահատում " թեմայով՝ նվիրված Հայոց ցեղասպանության 100-ամյա տարելիցին, հայտնում է Armenianweekly-ին:
Գիտաժողովը կազմակերպվելու է նույն համալսարանի պատմության ֆակուլտետի պրոֆեսոր Պետրոս Տեր-Մաթոսյանի կողմից: Միջոցառման հովանավորներն են Հրեական հետազոտությունների Նորման և Բերինիս Հարիս կենտրոնը, ԱՄՆ Հայկական հետազոտությունների և ուսումնասիրությունների ազգային ասոցիացիան (NAASR), ԱՄՆ-ում Հայագիտական ընկերակցությունը (SAS), նույն համալսարանի Պատմության ֆակուլտետը, Մարդու իրավունքների և մարդասիրական հարցերի մշտական ծրագիրը, Կանանց և գենդերային հետազոտությունների ծրագիրը, ինչպես նաև նույն համալսարանի Էթնիկական հետազոտությունների ինստիտուտը:
Գիտաժողովի ընթացքում քննարկման հիմնական թեմաներ են լինելու Հայոց ցեղասպանության մարդասիրական և հումանիտար միջամտությունը, կանայք և երեխաները Հայոց ցեղասպանության համատեքստում, Հայոց ցեղասպանության համեմատական հարթությունները, ինչպես նաև Հայոց ցեղասպանության ազդեցությունը հասարակության, քաղաքականության, գրականության և մշակույթի վրա: Միջոցառմանը կմասնակցեն 22 գիտնական Հայաստանի, Կամբոջայի, Կանադայի, Հոլանդիայի, Հունգարիայի, Իսրայելի և Միացյալ Նահանգների 17 տարբեր գիտական հաստատություններից: