Ռուս մոտոցիկլիստների խումբը՝ Վլադիմիր Պուտինի հովանավորությամբ, նախատեսում է շրջագայել Եվրոպայի տարածքով՝ նշելու Երկրորդ համաշխարհային պատերազմի ժամանակ նացիստական Գերմանիայի դեմ Կարմիր բանակի և սովետական ժողովրդի տարած հաղթանակի 70-ամյակը: Երկու շաբաթ տևողություն ունեցող շրջագայության ընթացքում ռուս մոտոցիկլիստները, որոնց միանալու է նաև Night Wolves` «Գիշերային գայլեր» ազգայնական մոտոցիկլիստների ակումբը, կանցնի Բելառուսի, Լեհաստանի, Չեխիայի, Սլովակիայի և Ավստրիայի տարածքով, նախքան մայիսի 9-ին Բեռլինում կանգ առնելը: Ճամփորդության ընթացքում նրանք կայցելեն Աուշվից-Բիրկենաուի նացիստական համակենտրոնացման մահվան ճամբար, ինչպես նաև Բեռլինի Trepower այգին, որը հայտնի է խորհրդային պատերազմի զոհերի հիշատակին նվիրված հուշահամալիրով:
«Գիշերային գայլեր» ակումբի ղեկավար Բաբրովսկին հայտնել է, որ շատ Եվրոպացիներ ցանկություն են հայտնել մասնակցելու շրջագայությանը, այդ թվում՝ գերմանացիներ: Ռուսների այս նախաձեռնությունը, այնուամենայնիվ, մեծ իրարանցում է առաջացրել Լեհաստանում, որը Ուկրաինայի արևմտամետ կառավարության կողմնակիցներից է: Facebook-ի լեհական էջերից մեկը գրել է՝ «Ռուս ավազակների համար մուտք չկա Լեհաստանում» և կոչ է անելով արգելել նրանց նախաձեռնությունը:
Մոտոցիկլիստներն իրենց հերթին պնդում են, որ իրենց ճանապարհորդությունը քաղաքական դրդապատճառներ չունի: Հիմնական նպատակը Երկրորդ համաշխարհային պատերազմի մարտադաշտերում Հիտլերի դեմ պայքարող զինվորների և անմեղ քաղաքացիների հիշատակը հարգելն է: