Ստամբուլի դատարանը, որը որոշում էր կայացրել Թուրքական ղեկավարության դեմ դավադրություն կազմակերպելու մեջ մեղադրվող 75 բանտարկյալների ազատ արձակելու մասին, գործել է ԱՄՆ-ում բնակվող ընդդիմադիր քարոզիչ Ֆեթուլլահ Գյուլենի թելադրանքով։ Այս մասին հայտարարել է Թուրքիայի վարչապետ Ահմեթ Դավութօղլուն, փոխանցում է РИА Новости-ն։
Նախօրեին Ստամբուլի դատարանը որոշում էր կայացրել «զուգահեռ պետության» գործով մեղադրվող 75 բանտարկյալների ազատ արձակելու մասին, սակայն ավելի բարձր ատյանները դատախազության խնդրանքով բեկանել էին այդ որոշումը։
Դավութօղլուն հայտարարել է, որ դատարանը, որը նման որոշում կայացնելու լիազորություն չուներ, դուրս է եկել օրենքի շրջանակից և «իրավագիտության մեջ պետական հեղաշրջման փորձ է արել»։
Թուրքիայում «զուգահեռ պետություն» անվանում են Գլուլենի գլխավորած «Հիզմեթ» շարժման, որին Էրդողանը մեղադրում է թուրքական կառավարության տապալել ցանկանալու մեջ։