Փարիզի քաղաքապետ Անն Իդալգոն Հայաստանի ԱԳ նախարար Էդվարդ Նալբանդյանի ներկայությամբ քաղաքապետարանի շենքում բացել է «Հայաստան 1915. Փարիզը հյուրընկալում է Երևանի Հայոց ցեղասպանության թանգարան-ինստիտուտի հավաքածուն» խորագրով ցուցահանդեսը՝ Հայոց ցեղասպանության 100-րդ տարելիցի շրջանակներում: Այս մասին հաղորդում է Ֆրանսիայում ՀՀ դեսպանատան Twitter-ի էջը: Բացման արարողությանը ներկա են եղել հայ համայնքի ներկայացուցիչներ, այդ թվում՝ Շառլ Ազնավուրը: Ցուցահանդեսը կտևի մինչև հուլիսի 4-ը:
Ցուցահանդեսում հիմնականում ներկայացվելու են Ցեղասպանության թեման լուսաբանող հարյուրավոր փաստաթղթեր, լուսանկարներ և այլ ցուցանմուշներ՝ բերված Հայոց ցեղասպանության թանգարան-ինստիտուտից, ինչպես նաև՝ Փարիզի Նուբարյան գրադարանից: Առանձին բաժին կնվիրվի Ավրորա Մարդիգանյանի կենսագրությանը: