Մայիսի 3-ին կայանալիք ԼՂՀ խորհրդարանական ընտրություններին ընդառաջ՝ «Արմեդիա» ՏՎԳ-նանցկացրել է հարցազրույցների շարք ընտրություններին մասնակցող կուսակցությունների ներկայացուցիչների հետ: Ձեզ ենք ներկայացնում «Արմեդիա» ՏՎԳ-ի բացառիկ հարցազրույցը Արցախի «Խաղաղություն և զարգացում» կուսակցության շտաբի պետ Վարուժան Գաբրիելյանի հետ:
- Պարո՛ն Գաբրիելյան, ինչպե՞ս եք գնահատում ընթացող նախընտրական պայքարը, արդյո՞ք ապահովված են բոլոր պայմանները թափանցիկ և լեգիտիմ ընտրությունների անցկացման համար:
- ԼՂՀ Սահմանադրությունն ու Ընտրական օրենսգիրքը տալիս են այդ հնարավորությունը: Այլ հարց է, թե ինչպիսին է ընտրությունների կազմակերպման որակը: Այդ հարցում նկատելի է պետության պասիվությունը: Եթե չլինի քաղաքական ուժերի շահագրգռվածությունը ընտրական գործընթացների մեջ, հնարավոր է այլ ձևով չիմանայինք, որ Արցախում համապետական ընտրություններ են: Օրինակ` Արցախի հանրային հեռուստատեսությունը վերջին երեք շաբաթվա ընթացքում չի հեռարձակել գոնե մեկ ռեպորտաժ քարոզարշավի մասին: Քաղաքական ուժերի միջև չկան բանավեճեր, չկա նման հարթակ, կուսակցությունների ծրագրերի մասին մարդիկ տեղեկանում են միայն նախընտրական խոստումներից: Այն համայնքներում, որտեղ բնակիչները զրկված են կամ քիչ հնարավորություն ունեն լրատվություն ստանալու (իսկ այդպիսիք բազմաթիվ են), գործում է տեղեկատվության միայն վարչական համակարգը: Շրջաններում մեր հանդիպումների ժամանակ մենք բազմիցս հանդիպել ենք վերոհիշյալ խնդիրներին: Բնականաբար, այս ամենն ազդում է ընտրողների կողմնորոշման վրա:
- Ինչպե՞ս կբնութագրեք կայանալիք ԼՂՀ ԱԺ ընտրությունների կարևորությունը: Ըստ Ձեզ, այս ընտրությունները կարո՞ղ են առաջընթաց ապահովել ԼՂՀ ժողովրդավարացման գործընթացում:
- Արցախում ժողովրդաիշխության հաստատման միակ ճանապարհն է դա: Մենք դեռևս ունենք այդ հնարավորությունը:
- Որքանո՞վ այս ընտրությունները կազդեն ԼՂՀ-ի վերաբերյալ միջազգային ընկալումների փոփոխության և արտաքին հարաբերությունների զարգացման վրա: Կարո՞ղ ենք ակնկալել ԼՂՀ սուբյեկտայնության բարձրացմանն ուղղված լրացուցիչ ջանքեր ընտրություններից հետո:
- ԵԱՀԿ Մինսկի խումբը երեկ հայտարարություն էր տարածել, որ չեն ընդունում այս ընտրությունների արդյունքների ազդեցությունը Լեռնային Ղարաբաղի իրավական կարգավիճակի վրա, և որ դրանք որևէ կերպ չեն կանխորոշում ԼՂՀ-ի վերջնական կարգավիճակը կամ ընթացիկ բանակցությունների արդյունքները: Նույն այս տրամաբանությամբ կարելի է ասել, որ Մինսկի խմբի ներկա ձևաչափով արձանագրած ցանկացած «առաջընթաց» կմնա թղթի վրա, եթե համանախագահող երկրները և ամբողջապես ԵԱՀԿ-ն շարունակեն անտեսել Արցախի ժողովրդի իրավունքի ու կամարտահատման փորձերը: Այստեղ և այս օրերին է որոշվում նաև նրանց առաքելության իրական արդյունքը:
- Ինչպիսի՞ն է ղարաբաղյան հակամարտության կարգավորման գործընթացի Ձեր տեսլականը:
- Հակամարտության կարգավորման ուղին և տեսլականը շեշտված են մեր անվան մեջ: Նախընտրական ծրագրում մենք հստակ արձանագրել ենք խորհրդարանական գործունեության շրջանակում մեր անելիքները. մինչև 2015 թվականի վերջը մշակել Լեռնային Ղարաբաղի Հանրապետության և Ադրբեջանի Հանրապետության միջև զինված հակամարտության դադարեցման, խաղաղության հաստատման և համագործակցական հարաբերությունների վերականգնման պայմանագրի նախագիծ, 2016 թվականի ընթացքում այդ պայմանագրի նախագծի հասարակական ու միջխորհրդարանական քննարկումներ անցկացնել Արցախում, Հայաստանում և Ադրբեջանում:
Հակամարտության կարգավորման շուրջ տեսլականը պետք է ձևակերպվի հստակ, և մեր առաքելությունը նաև դա է:
- Ո՞րն է ձեր կուսակցության հիմնական առանձնահատկությունը՝ մյուս քաղաքական ուժերի հետ համեմատած:
- Իշխանություն ձևավորած ուժերից «ամենաերիտասարդն» արդեն 10 տարեկան է: Նրանցից ավելին սպասել այլևս չենք կարող: Թեև երիտասարդական ներուժով կուսակցություն ենք, սակայն պրոֆեսիոնալ խորհրդարանի համար առաջադրել ենք իրենց ոլորտում հայտնի մասնագետների և այս ընտրություններում ներկայացրել ենք «չափելի» նախընտրական ծրագիր:
Մենք վստահ ենք, որ Արցախում խաղաղությունը և զարգացումն այլընտրանք չունեն, և այս ընտրություններին մասնակցում ենք «Ապագան մերն է» կարգախոսով: