Բրյուսելում կայացած Եվրամիության խորհրդի արտաքին քաղաքականության և անվտանգության վերաբերյալ նիստի ժամանակ որոշում է կայացվել ռազմածովային գործողություն սկսել Աֆրիկայից և Ասիայից միգրանտներ տեղափոխող նավերը ոչնչացնելու նպատակով։
«Հիմնական նպատակը ոչ այդքան նավերի ոչնչացում է, որքան՝ մաքսանենգերի բիզնես-մոդելի ոչնչացումը»,- նշել է ԵՄ արտաքին քաղաքականության և անվտանգության հարցերով գերագույն հանձնակատար Ֆեդերիկ Մոգերինին, տեղեկացնում է euronews-ը։
Մոգերինին նախատեսում է, որ գործողությունն ամբողջությամբ կսկսվի արդեն հաջորդ ամիս։ Այս նպատակով որոշվել է ստեղծել ռազմածովային ստորաբաժանում, որի կենտրոնակայանը կգտնվի Հռոմում։ ԵՄ այս նախաձեռնությանն աջակցություն է հայտնել նաև ՆԱՏՕ-ն։ «Դաշինքը պատրաստ է օգնել, եթե դրա կարիքը զգացվի»,- հայտարարել է ՆԱՏՕ-ի գլխավոր քարտուղար Յենս Սթոլթենբերգը։
Չնայած որ ԵՄ միասնականություն է դրսևորել ռազմական գործողություն սկսելու մասին որոշման ընդունման ժամանակ, սակայն Եվրամիությունում գնալով մեծանում են միգրանտների քվոտաներ սահմանելու շուրջ տարաձայնությունները։ Այսպես, նախորդ շաբաթ Եվրամիությունն ընդունել է «Միգրացիայի համար եվրոպական օրակարգ», որով առաջին անգամ սահմանվում են երկարաժամկետ քվոտաներ, ինչպես նաև ենթադրվում է միգրանտների համաչափ տեղաբաշխում ԵՄ երկրների միջև: Ծրագիրը սահմանում է յուրաքանչյուր եվրոպական երկրի՝ միգրանտներ ընդունելու առավելագույն սահմանագիծը՝ հիմնված տվյալ երկրի սոցիալ-տնտեսական, ժողովրդագրական, գործազրկության մակարդակների և այլ գործոնների վրա:
Այս ծրագրի համաձայն՝ եթե երկրներից որևէ մեկն արդեն ընդունել է իր համար սահմանված միգրանտների առավելագույն քանակը, ապա վերջիններիս հոսքը պետք է ուղղվի այն երկրներ, որոնք դեռ չեն լրացրել իրենց քվոտաները:
Քվոտաների սահմանման դեմ արդեն հանդես են եկել Սլովակիան, Լատվիան, Էստոնիան, Չեխիան, Հունգարիան, Իռլանդիան, Դանիան, Ֆրանսիան, Մեծ Բրիտանիան: Վերջինս արդեն բավականի երկար ժամանակ է քննարկվում է ԵՄ կազմից դուրս գալու հարցը, և միգրացիոն այս ծրագիրը կարող է նպաստել ինչպես իշխանությունների, այնպես էլ բնակչության տրամադրվածության սրմանը: Ծրագրին դեմ երկրներին միացել է նաև Իսպանիան։ Վերջինս դեմ է քվոտաների սահմանմանը՝ ՀՆԱ-ի, գործազրկության և արդեն ընդունած միգրանտների քանակի հիման վրա։ Այս մասին հայտարարել է Իսպանիայի արտգործնախարար Խոսե Մանուել Գարսիա-Մարգալոն։
Ավելացնենք, որ Եվրամությունում վերջին շրջանում միգրացիայի շուրջ ընթացող քննակումները պայմանավորված են Միջերկրականի ապրիլյան ողբերգության հետ, երբ խորտակվեց Աֆրիկայից 800 միգրանտ տեղափոխող նավը: Միգրացիայի միջազգային կազմակերպության տվյալների համաձայն՝ այս տարի Միջերկրականով Եվրոպա անցնելու ժամանակ մահացել է 1830 միգրանտ՝ նախորդ տարվա նույն ժամանակահատվածի 207-ի համեմատ։