Հայ պատմաբան Ռայմոնդ Գևորգյանի՝ Ցեղասպանության շուրջ իրականացրած ուսումնասիրություններն ամփոփող «Հայոց ցեղասպանություն» գիրքը թարգմանվել է թուրքերեն։ Ինչպես նշում է Artsakhpress.am-ը, հղում կատարելով CNN Turk-ին, Ահմեթ Ինսելի ու Քերեմ Ունյուվարի խմբագրությամբ լույս տեսած գրքի թուրքերեն տարբերակի թարգմանիչը Այշեն Թաշքենթ Էքմեքչին է։
1167 էջանոց գիրքը, որը ֆրանսերենով լույս էր տեսել 2006 թվականին, 6 հիմնական բաժիններից է բաղկացած, որոնցում խոսվում է 19-րդ դարի վերջի իրադարձություններից մինչև Թուրքիայի Հանրապետության հիմնադրումը։
Հայերն Աբդուլ Համիդի ռեժիմի դեմ պայքարում էին երիտթուրքերի հետ, որոնց կողմից էլ մի քանի տարի անց ոչնչացվեցին։ Սակայն ի՞նչ տեղի ունեցավ, որ 1895 թվականից հետո հայերը համակարգված ձևով «սատանայացան». պատմաբան Ռայմոնդ Գևորգյանի ամենաընդգրկուն ուսումնասիրություններից մեկում կան այդ հարցերի պատասխանները, ինչպես նաև պատմվում է տեղի ունեցած դեպքերի մասին յուրաքանչյուր քաղաքում։