Մեծ Բրիտանիայի թագուհի Եղիսաբեթ Երկրորդը չորեքշաբթի օրը հանդես է եկել ամենամյա ելույթով: Դա թագուհու ավանդական տարեկան ելույթն է, որը ներկայացնում է կառավարության գործությունեության ծրագիրն առաջիկա խորհրդարանական տարվա համար: Փաստաթղթի տեքստը մշակվում է գործող վարչապետի գլխավորությամբ:
Իր ելույթում թագուհին Ուկրաինայի հակամարտության լուծումը, Սիրիայում խաղաղության հաստատմանն ուղղված միջազգային ջանքերին աջակցելն ու պայքարը ԴԱԻՇ ահաբեկչական խմբավորման դեմ տարվա ընթացքում Մեծ Բրիտանիայի հիմնական արտաքին քաղաքական առաջնահերթություններ է հայտարարել։
Բացի այդ, թագուհին, ով համաձայն մի շարք աղբյուրների, աջակցում է ԵՄ-ից Բրիտանիայի դուրս գալուն, հայտարարել է, որ Եվրոպական Միությունը շարժվում է սխալ ուղղությամբ:
«Իմ կառավարությունը հանրաքվե կանցկացնի Եվրոպական միությանն անդամակցության շուրջ: Նոր դրույթներ կմտցվեն Իրավունքների բրիտանական բիլլում: Իմ նախարարները կպաշտպանեն խորհրդարանի սուվերենությունը և Համայնքների պալատի գերակայությունը», - նշել է թագուհին:
Ուշագրավ է, որ բացի թագուհուց, ԵՄ-ից Բրիտանիայի դուրս գալու մոլի կողմնակիցներից են նաև Լոնդոնի նախկին քաղաքապետ Բորիս Ջոնսոնը, ով համարվում է «Brexit»-ի ճամբարի ոչ պաշտոնական առաջնորդը, ինչպես նաև UKIP անջատողական կուսակցությունը՝ Նայջել Ֆարաժի գլխավորությամբ, ում հիմնական թեզերից մեկն է հենց Մեծ Բրիտանիայի հեռացումը Եվրոպական միությունից: Իսկ ՄԲ վարչապետ Դեյվիդ Քեմերոնն, ընդհակառակը, սատարում է ԵՄ կազմում մնալու և գործելու գաղափարը, չնայած հենց ինքն է խոստացել այդ հարցով հունիսին հանրաքվե անցկացնել երկրում:
Ինչևէ, Մեծ Բրիտանիայում հասարակական կարծիքի նոր հարցումը ցույց է տվել, որ ԵՄ կազմում Մեծ Բրիտանիայի պահպանման կողմնակիցների թիվը զգալիորեն գերազանցում է եվրահոռետեսների թվին: Այս մասին վկայում են Evening Standard թերթի համար Ipsos MORI ընկերության կատարած հարցման չորեքշաբթի հրապարակված արդյունքները:
Հարցման տվյալներով՝ հարցվածների 55%-ը մտադիր է հունիսի 23-ին կայանալիք հանրաքվեում քվեարկել Բրյուսելի հետ ներկայիս հարաբերությունները պահպանելու օգտին: Միության կազմից Բրիտանիայի դուրս գալու կողմնակիցների թիվը կազմել է 37%: