Հայաստանի ռուսական ռազմակայանում սկսվել են հետախուզական ստորաբաժանումների հատուկ-մարտավարական վարժանքները «Կամխուտ» բարձրլեռնային զորավարժարանում:
Ինչպես տեղեկացնում են ՌԴ Հարավային ռազմական օկրուգի մամուլի ծառայությունից, վարժանքներում, որոնք երեք օր տեղի կունենան ծովի մակերեւույթից ավելի քան 1,5 հազար մետր բարձրության վրա, գործի են դրված ավելի քան 300 զինծառայողներ և շուրջ 50 միավոր ռազմական տեխնիկա, այդ թվում՝ անօդաչու օդուժ:
Գործնական վարժանքների շրջանում զինծառայողները «Ռատնիկ» արդի հանդերձանքի և պիտույքների կիրառմամբ կսովորեն «գոյատևել» լեռնային-անտառապատ տեղանքում՝ բարդ կլիմայական պայմաններում, հայթայթել և պատրաստել կերակուր, վառել կրակ և կազմակերպել երթադադարներ՝ օգտագործելով առձեռն միջոցները և բնական առարկաներ: