Հիլարի Քլինթոնի բարձրացրած աղմուկը. Քաղաքական գործիչներն ու նրանց նմանակները
Լինում են դեպքեր, երբ մարդկանց արտաքին նմանությունն այնքան է, որ կարելի է նրանց անգամ շփոթել։ Սա վերաբերում է նաև աշխարհահռչակ քաղաքական գործիչներին:
Շատ առաջնորդներ իրենց նմանակներն ունեն և հաճախ նրանց օգտագործում են իրենց անվտանգության նկատառումներից ելնելով։ Նմանակներ ունեին այնպիսի պատմական գործիչներ, ինչպիսիք էին Իոսիֆ Ստալինը, Ադոլֆ Հիտլերը:
Մեր օրերում շատերը պնդում են, որ իրենց նմանակներին են երբեմն օգտագործում Ռուսաստանի վարչապետ Դմիտրի Մեդվեդևն ու նախագահ Վլադիմիր Պուտինը:
Իսկ ահա ԱՄՆ նախագահ Բարաք Օբամայի նմանակներից մեկը` երիտասարդ Սյաո Ժուգոն, ով ոչ միայն արտաքնապես է նման պետության ղեկավարին, այլև շատ լավ նմանակում է նրա շարժուձևն ու խոսքը, ապրում է Չինաստանի կենտրոնական Սիչուան նահանգում:
ԱՄՆ նախկին պետքարտուղար և ներկայիս նախագահի թեկնածու Հիլարի Քլինթոնն էլ այժմ մեծ աղմուկ է բարձրացրել ենթադրյալ նմանակի պատճառով, ով իբր օրերս իր փոխարեն հանրության առաջ է դուրս եկել:
Բանն այն է, որ սոցիալական կայքերի մի շարք օգտատերեր պնդում են, թե դեմոկրատ Քլինթոնը սեպտեմբերի 11-ի զոհերի հիշատակին նվիրված միջոցառման ժամանակ ինքնազգացողության վատանալու պատճառով որոշել է իր նմանակին հետագայում օգտագործել:
Օգտատերերը ակտիվորեն լուսանկարներ են հրապարակում և համեմատություններ անցկացնում` «ֆիզիկական տարբերություններ» գտնելով Քլինթոնի նախկին և նոր լուսանկարների միջև:
Քանի որ Քլինթոնը լուրջ հիվանդ է թոքաբորբով, ըստ օգտատերերի, ստիպված է նմանակին օգտագործել՝ հիվանդությունը թաքցնելու համար։
Ինչևէ, հետաքրքրական է նաև, որ մինչ այս վերջին աղմուկը, տարիներ շարունակ Հիլարի Քլինթոնին նմանեցնում էին բրիտանացի դերասանուհի Էմմա Թոմփսոնին, ով ի դեպ պակաս հայտնի չէ նաև իր հասարակական-քաղաքական ակտիվ գործունեության համար:
