Թուրքիան չի հանդուրժի Սիրիայում, Իրաքում և տարածաշրջանի այլ երկրներում տեղի ունեցող բռնությունները: Այս մասին հայտարարել է Թուրքիայի նախագահ Ռեջեփ Թայիփ Էրդողանը նախագահական նստավայրում տեղական ինքնակառավարման մարմինների հետ հանդիպման ժամանակ,փոխանցում է Ermenihaber-ը՝ հղում կատարելով թուրքական պետական «Anadolu» լրատվական գործակալությանը:
Էրդողանն ընդգծել է, որ բոլոր նրանք, ովքեր Սիրիայում և Իրաքում տուժել են «Իսլամական պետություն» ահաբեկչական կազմակերպության կամ կրոնական այլ խմբավորումների բռնություններից, իրենց եղբայրներն են:
Եվ այս պարագայում, նրանք, ովքեր Թուրքիային այս ամենին չխառնվելու կոչ են անում, «պետք է իմանան, որ թուրքերը չեն կարող իրենց սիրտը պոկել և դուրս նետել»:
«Ինչպես անցյալում Աֆղանստանում, Բալկաններում, Ղարաբաղում, Ղրիմում և Կիպրոսում տեղի ունեցող բռնություններին ընդդիմացանք, այնպես էլ հիմա չենք հանդուրժի ճնշումներն Իրաքում, Սիրիայում և տարածաշրջանի այլ երկրներում: Այս կեցվածքը մեր պատմության ժառանգությունն է՝ թողնված մեզ»: