Մեծ Բրիտանիան սկզբունքորեն դեմ չէ ԵՄ անդամ երկրների միջև ռազմական համագործակցության խորացմանը և այդ համատեքստում ԵՄ հրամանատարական կենտրոն ստեղծելուն: Այս մասին հայտարարել է Մեծ Բրիտանիայի ԱԳ նախարար Բորիս Ջոնսոնը, ով ի դեպ նախօրեին արգելափակել էր այդ կենտրոնի ստեղծման մասին որոշումը:
Նշենք, որ նման կենտրոն ստեղծելու մասին որոշումը կայացվել է 2017 թվականի մարտի սկզբին ԵՄ անդամ երկրների ԱԳ և պաշտպանության նախարարների Բրյուսելում կայացած հանդիպման ժամանակ: Այդ ժամանակ Լոնդոնը կողմ է արտահայտվել այս նախաձեռնությանը:
Որոշ վերլուծաբանների կարծիքով բրիտանական իշխանությունների կողմից ԵՄ հրամանատարական կենտրոնի ստեղծման արգելափակումը պայմանավորված է հունիսին երկրում սպասվող արտահերթ խորհրդարանական ընտրություններով և կոչված է քաղաքական դիվիդենտներ ապահովելուն իշխանությունների համար: Ուստի Բրյուսելում կարծում են, որ բրիտանական ընտրություններից հետո այս որոշումն կյանքի կկոչվի:
Տեղեկանք
Ենթադրվում է, որ ԵՄ հրամանատարական կենտրոնը կոորդիացնելու է Եվրամիության ոչ ռազմական առաքելություններն արտերկրում. նման առաքելություններ այս պահին գործում են Մալիում, Սոմալիում և Կենտրոնական Աֆրիկական Հանրապետությունում: ԵՄ արտաքին քաղաքականության և անվտանգության հարցերով բարձր հանձնակատար Ֆեդերիկա Մոգերինիի խոսքերով, նման կենտրոնի ստեղծումը թույլ է տալու ավելի արդյունավետ կառավարել եվրոպական ռազմական ուսումնական ծրագրերը: Նշվում է, որ կենտրոնն ունենալու է 30 աշխատակից և գործելու է ԵՄ արտաքին քաղաքական և անվտանգության ծառայության շրջանակներում:
Լոնդոնը սկզբունքորեն դեմ է հանդես գալիս ԵՄ բանակ ստեղծելու գաղափարին, որն 2015 թվականից շրջանառության մեջ դրվեց Եվրահանձնաժողովի նախագահ Ժան-Կլոդ Յունկերի կողմից և աջակցություն ստացավ մասնավորապես Գերմանիայի կանցլեր Անգելա Մերկելի կողմից: Միացյալ Թագավորությունը, որը պատրաստվում է մոտ ապագայում լքել Եվրամիությունը, ԵՄ ընդհանուր բանակի ստեղծման մեջ որոշակի վտանգներ է տեսնում իր համար: Մասնավորապես, բրիտանական իշխանությունները մտավախություն ունեն, որ ԵՄ անդամ երկրների միջև համագործակցության խորացումը կթուլացնի վերջիններիս ներգրավվածությունը ՆԱՏՕ-ում:
Ռազմական համագործակցությունը խորացնելու շուրջ ԵՄ երկրները մտածում էին դեռ վաղուց: Այս գաղափարն ավելի առարկայական քննարկման առարկա դարձավ 2014 թվականին Ղրիմի՝ Ռուսաստանին վերամիավորվելուց հետո և իսլամիստական ահաբեկչական սպառնալիքի մեծացմանը զուգահեռ: ԱՄՆ-ի նախագահ Դոնալդ Թրամփի հայտարարությունն այն մասին, որ Միացյալ Նահանգները նվազեցնում է ՆԱՏՕ-ում իր եվրոպական դաշնակիցների անվտանգության համար պատասխանատվությունը, եվրապական երկրների համար այս ուղղությամբ համագործակացությունն ամրապնդելու հստակ ազդակ հանդիսացավ: