Հունգարիան խորհրդակցությունների համար հետ է կանչում Նիդերլանդներում իր դեսպանին և իջեցնում է այդ երկրում դիվանագիտական ներկայացչության մակարդակը՝ ժամանակավոր հավատարմատարի մակարդակի: Այս մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն:
Դիվանագիտական հարաբերությունների մակարդակի իջեցման պատճառ է դարձել Հունգարիայում Նիդերլանդների դեսպան Գայուս Շելտեմի հարցազրույցը հունգարական ԶԼՄ-ներին: Դիվանագետը Հունգարիայի կառավարոթյունը համեմատել է ահաբեկիչների հետ և պնդել է, որ «իսլամիստ ծայրահեղականները թշնամու կերպար ստեղծելու ժամանակ կիրառում են այն նույն սկզբունքները, ինչ հունգարական կառավարությունը»:
Այս արտահայտությունների պատճառով ԱԳ նախարար Պետեր Սիյարտոն պահանջել է, որ դեսպանն այլևս երբեք չհայտնվի Հունգարիայի ԱԳՆ-ում: Ըստ Սիյարտոի՝ երկու երկրների միջև դիվանագիտական շփումները դեսպանի մակարդակով կդադարեցվեն անորոշ ժամկետով: «Սա դիվանագիտության մեջ ամենածայրահեղ քայլն է»,- նախարարի խոսքերը մեջբերում է MTI գործակալությունը:
Նախարարը նաև ժամանակավոր հավատարմատարին հանձնարարել է «վճռականորեն հերքել Բուդապեշտի դեմ հնչող մեղադրանքները և պարզաբանումներ պահանջել Նիդերլանդների ԱԳՆ-ից»: «Որևէ մեկին չի թույլատրվում նման դիտողություններ անել Հունգարիայի կամ հունգարացի ժողովրդի հասցեին»,- շեշտել է նախարարը: