Ամանորյա արձակուրդը լավագույն ժամանակն է տնային ջերմ միջավայրում մի բաժակ թեյով ու տոնական քաղցրավենիքներով ֆիլմեր նայելու համար: Ձեր ուշադրությանն ենք ներկայացնում 2017թ. մի քանի ֆիլմ, որոնք կզարդարեն Ձեր հանգստյան օրերը:
«Նա և նա» (Mr & Mme Adelman)
Տղամարդկանց հաջողության բանալին հաճախ նրանց կյանքում առկա խելացի և ուժեղ կանայք են: Այդպես է նաև հայտնի «հրեա» գրող Ադելմանի պարագայում: Սկսնակ ֆրանսիացի գրողը, ով փնտրում է իր մուսային, հանդիպում է դասական գրականության մասնագետ Սառային, և այդ ոչ այնքան բարետես ու աննկատ աղջիկը փոխում է ամեն ինչ նրա կյանքում: Ներկայացված է կյանքի պատմություն՝ լի վայրիվերումներով, վերելքներով ու վայրէջքներով, հիասթափություններով ու հարվածներով: Իսկ գուցե ամեն ինչ մի փոքր ա՞յլ կերպ է, քան պատկերացնում են բոլորը: Ինչպես ասում են, «Chercher la femme»:
«Չնայած ոչնչին» (Mein Blind Date mit dem Leben)
Իսկ ինչպե՞ս եք Դուք պատկերացնում ժամանակակից գերմանական կատակերգությունը: Այս ֆիլմը հաստատ կկոտրի բոլոր կարծրատիպերը: Հիվանդության պատճառով կուրացող երիտասարդն ունի ոչ այնքան հավակնոտ, բայց, ավաղ, անիրատեսական երազանք և կանգ չի առնի ոչ մի խոչընդոտի առաջ: Անհեթեթ արկածներով, զավեշտալի իրավիճակներով ու առաջին հայացքից անհաղթահարելի բարդություններով այդ ուղին հաղթահարել կօգնեն իսկական ընկերները: Վայելեք այս ջերմ և ուրախ ֆիլմը և հավատացեք, որ Ձեր երազանքների իրագործումը կախված է միայն Ձեզանից:
«Արիթմիա» (Аритмия)
Ռուսական այս ֆիլմը պատմում է իրական կյանքի մասին, որտեղ աշխատանքը կլանում է ողջ ժամանակը, անձնական կյանքը քայքայվում է, իսկ մարդկային արժեքները բախման մեջ են մտնում բյուրոկրատական ստանդարտների հետ: Ամեն օր մարդկային կյանքեր փրկող մարդիկ հաճախ այնքան են խճճվում իրենց սեփական կյանքում, որ դադարում են պայքարել երջանկության համար: Սովորական պատմություն սովորական մարդկանց մասին, որը, գուցե, ձեզ ևս ստիպի մի պահ այլ հայացքով նայել կյանքին:
«Սիրո մասին» (Про любовь. Только для взрослых)
Ինչպիսի՞ն է սերը: Յուրաքանչյուր զույգի մոտ այն տարբեր է: Փոքրիկ պատմություններից կազմված այս ֆիլմը պատմում է սիրո տարբեր դրսևորումների մասին՝ բարձրացնելով հավերժական հարցեր. կա արդյո՞ք հավերժ սեր, ինչպե՞ս պահպանել սերը, ինչպե՞ս գտնել այն և այլն: Գեղեցիկ ֆիլմ անկրկնելի Մալկովիչի մասնակցությամբ, որը ոչ միայն ուրախ ժամանց կապահովի, այլև նոր առիթ կհանդիսանա ամենակարևորի մասին մտածելու համար:
«Կենդանին» (Живое)
Արդյո՞ք կա կյանք այլ մոլորակներում: Եվ ինչպիսի՞ն է այդ կյանքը: Չափազանց լարված և հետաքրքիր այս պատմությունը տիզերագնացների մասին է, որոնց տրամադրության տակ է հայտնվում Մարսից հայտնաբերված կենդանի օրգանիզմ, որի ուսումնասիրությունը վեր է ածվում իսկական մղձավանջի: