Փետրվարի 20-ին Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինը մի շարք հանդիպումներ է ունեցել խորհրդարանում:
ՀՀ ԱԺ «Իմ քայլը» խմբակցության ղեկավար Լիլիթ Մակունցի հետ հանդիպմանը մասնակցել է նաև խմբակցության անդամ Ալեքսեյ Սանդիկովը:
Լիլիթ Մակունցը դրական է գնահատել անցած ամիսների ընթացքում դեսպանի հետ համագործակցությունը ՀՀ Կառավարությունում և հույս հայտնել, որ այն առավել արդյունավետ կշարունակվի խորհրդարանական մակարդակում: Անդրադառնալով վերջին շրջանում մամուլում տեղ գտած՝ հայ-ռուսական հարաբերություններին վերաբերող տարաբնույթ մեկնաբանություններին՝ խմբակցության ղեկավարը նշել է, որ դրանք կապված չեն հայաստանյան գործընթացների հետ և չեն արտացոլում Ռուսաստանի Դաշնության պաշտոնական տեսակետը: Նրա խոսքով՝ դրանք առանձին անհատների մեկնաբանություններ են, ինչի հետ համամիտ է եղել նաև դեսպանը:
Պատգամավոր Ալեքսեյ Սանդիկովն անդրադարձել է ռուսական դպրոցներում և դասարաններում հայերենի դասավանդման ծրագրերին, կարևորել երկու երկրների միջև միջմշակութային կապերի աշխուժացումը:
Դեսպան Սերգեյ Կոպիրկինը, դրական գնահատելով անցած ամիսների համագործակցությունը, առանձնակի ընդգծել է միջխորհրդարանական և միջազգային հարթակներում շփումների ու փոխգործակցության կարևորությունը:
Նույն օրը Հայաստանում Ռուսաստանի արտակարգ և լիազոր դեսպան Սերգեյ Կոպիրկինի հետ հանդիպել է ՀՀ ԱԺ տնտեսական հարցերի մշտական հանձնաժողովի նախագահ Բաբկեն Թունյանը:
Զրուցակիցները խոսել են հայ-ռուսական բարեկամական հարաբերություններից, կարևորել երկու երկրների միջև կապերի դինամիկ զարգացումը:
Կողմերը պատրաստակամություն են հայտնել նպաստելու Հայաստանի և Ռուսաստանի միջև տարբեր ձևաչափերով ինչպես տնտեսական, այնպես էլ այլ ոլորտներին առնչվող համագործակցության խորացմանը:
Հայաստանում Ռուսաստանի արտակարգ և լիազոր դեսպան Սերգեյ Կոպիրկինը հանդիպել է նաև ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի հետ: Հանձնաժողովի նախագահը ներկայացրել է վերջին ամիսներին Հայաստանում տեղի ունեցած քաղաքական գործընթացները՝ ընդգծելով, որ ձևավորված է լեգիտիմության բարձր աստիճան ունեցող խորհրդարան: Անդրանիկ Քոչարյանը կարևորել է միջխորհրդարանական համագործակցության խորացումը՝ ընդգծելով օրենսդիր մարմինների համանման հանձնաժողովների համատեղ արդյունավետ աշխատանքը:
Հանձնաժողովի նախագահի խոսքով՝ մեր երկիրը կարևորում է Ռուսաստանի և Հայաստանի ուժային կառույցների սերտ փոխգործակցությունը: Նա անդրադարձել է նաև միջխորհրդարանական հարթակներում, մասնավորապես ՀԱՊԿ ԽՎ-ում և ԱՊՀ ՄԽՎ-ում համատեղ աշխատանքի կարևորությանը:
Դեսպանը շնորհավորել է Անդրանիկ Քոչարյանին հանձնաժողովի նախագահ ընտրվելու կապակցությամբ՝ համոզմունք հայտնելով, որ նա պաշտպանության և անվտանգության ոլորտում իր փորձառությունն ու գիտելիքները կուղղի խնդիրների վերհանմանն ու լուծմանը: