ՀՀ զինված ուժերի գլխավոր շտաբի` կառավարության հրաժարականի պահանջը ահազանգ էր այն մասին, որ իշխանությունը խոչընդոտում է բանակի ամրապնդմանն ու վերականգնմանը։ Ընդ որում, խանգարում է համակարգային մակարդակով: Այս մասին ուսական լրատվամիջոցների համար այսօր կայացած մամուլի ասուլիսի ժամանակ նման կարծիք հայտնեց ՀՀ երկրորդ նախագահ Ռոբերտ Քոչարյանը, հայտնում է «Սպուտնիկ Արմենիա»-ն:
Նրա խոսքով՝ վարչապետը «Իսկանդերի» թեմայով աղմկահարույց պատմությունից հետո պետք է ներողություն խնդրի Գլխավոր շտաբից եւ անձամբ գեներալ Տիրան Խաչատրյանից։ Սակայն դրա փոխարեն վարչապետը Տիրան Խաչատրյանին ազատեց պաշտոնից։
«Հարձակումները բանակի, գեներալների վրա երեք տարվա ընթացքում հաջորդում էին միմյանց, կրկնվում պարբերաբար։ Սա, ըստ Քոչարյանի, պատերազմում պարտության պատճառներից մեկն է. իշխանության քայլերը պետք է կանխատեսելի ու հասկանալի լինեն։ Նման ռեժիմով անհնար է երկիր կառավարել։ Գլխավոր շտաբի դեպքը փաստում է երկրում տիրող անհույս վիճակի մասին»,-ասաց Քոչարյանը:
Անդրադառնալով ԳՇ պետ Օնիկ Գասպարյանի հեռացման թեմային՝ նախկին նախագահը պարզաբանեց, որ ՀՀ նախագահ Արմեն Սարգսյանը Սահմանադրության շրջանակում գործելու 3 տարբերակ ունի:
«Առաջին տարբերակն այն է, որ նախագահը համաձայնվում է Փաշինյանի առաջարկին եւ ստորագրում այն, իսկ երկրորդը` նախագահը չի ստորագրում հրամանագիրը, բայց այն ուժի մեջ է մտնում, երրորդը`իրավական դաշտում է փորձում լուծում գտնել»,-ասաց Քոչարյանը:
Ըստ Քոչարյանի` ստացվում է, որ առաջին երկու տարբերակի դեպքում էլ նախագահը համաձայնվում է վարչապետի որոշման հետ։ Սակայն Քոչարյանը կարծում է, որ նախագահը պետք է կողմնորոշվի` կո՞ղմ է, թե՞ դեմ, եւ որ որեւէ խոչընդոտ չկա, որպեսզի նախագահն արտահայտի իր հստակ տեսակետը: