Եթե դեռ չեք մոռացել մեկ ուրիշի վշտին ցավակից լինելու մասին

• 17.05.2022, 20:56
•  Աշխարհ,  Հայաստան,  ԼՂՀ

Panorama.am

«44-օրյա պատերազմում մեր տղաներն իրենց կյանքը գիտակցաբար զոհեցին՝ հավատելով, որ իրենց երկիրը թուրքը երբեք ոտք չի դնի, նրանք հավատացին, որ մինչև վերջ պայքարը գնալու է, հայը միշտ հաղթել է»,- Ֆրանսիայի հրապարակում հանրահավաքի ժամանակ ասաց նահատակված զինծառայողներից մեկի մայրը, փոխանցում է Panorama.am-ը։

Նա ասաց, որ իրենք ցավի, տառապանքի մեջ են ու դեռ պայքարում են։

«Եթե մենք կարող ենք այս ցավի ու տառապանքի մեջ  լինելով պայքարել, ապա ձեզանից պահանջվում է այդ տղաների հիշատակը վառ պահելու համար հավաքվել ու միասնական ուժերով հասնել մինչև վերջ։ Այսօր ընդամենը մի խնդրանք ունեմ՝ այս շարժումը քանի որ արդար շարժում է, երբեք չթողեք մարի, գնացեք մինչև վերջ, մենք ձեզ հետ ենք, դուք մեզ հետ։ Խնդրում եմ, կանգ չառնեք, եթե կանգ առաք, ուրեմն մեր վերջն է, հայն իրավունք չունի ապրելու։ Իսկակական թասիբով հայն այստեղ կանգնած է»,- ասաց զոհված զինծառայողի մայրը։

Զոհված հրետանավոր Հայկ Մելիքյանի մայրը՝  Նաիրա Մելիքյանը, կոչով դիմեց այն հատվածին, ովքեր տներում նստած են, դեռ շարունակում են ինչ-ինչ քննարկում, իրենց համար հիմնավորումներ են ստեղծում, որ իրենք հրապարակ դուրս չեն գալիս այս ինչի, այն ինչի համար։

«Այդ արդարացումներն այլևս մեզ չեն կարող համոզել։ Եթե ձեր մեջ կա խղճմտանք, եթե դեռ չեք մոռացել մեկ ուրիշի վշտին ցավակից լինելու մասին, դուրս եկեք և կանգնեք զոհվածների ծնողներիս կողքին»,- ասաց Ն.Մելիքյանը։