Հայաստանը տարեկան կտրվածքով 1000-1200 հետընդունման հայց է ստանում. առաջին տեղում են Գերմանիան, Ֆրանսիան, Չեխիան

• 13.06.2022, 18:00
•  Եվրոպա,  Աշխարհ,  Հայաստան

ԱԺ արտաքին հարաբերությունների մշտական հանձնաժողովի հունիսի 13-ի նիստում քննարկվող համաձայնագիրը հնարավորություն է տալիս ԵՄ անդամ բոլոր պետությունների հետ սահմանել և իրականացնել միասնական ընթացակարգեր՝ կողմերի տարածքներում առանց թույլտվության բնակվող անձանց հետընդունման հարցերում:

Քննարկվում է «ՀՀ կառավարության և Լեհաստանի Հանրապետության կառավարության միջև «ՀՀ և Եվրոպական միության միջև առանց թույլտվության բնակվող անձանց հետընդունման (ռեադմիսիայի) մասին» 2013 թվականի ապրիլի 19-ին Բրյուսելում կնքված համաձայնագրի կիրարկման արձանագրությունը վավերացնելու մասին» օրենքի նախագիծը:

ՀՀ տարածքային կառավարման և ենթակառուցվածքների նախարարության միգրացիոն ծառայության պետ Արմեն Ղազարյանը նշել է, որ տեխնիկական փաստաթուղթ է, որը սահմանում է հետընդունման գործընթացի իրականացումը, անցման կետերը, լիազոր մարմիններին, հետընդունման համար անհրաժեշտ փաստաթղթերի ցանկը և այլ տեխնիկական մանրամասներ:

Հայաստանն արդեն ԵՄ անդամ 5 երկրի՝ Գերմանիայի, Ֆրանսիայի, Չեխիայի, Էստոնիայի ու Բուլղարիայի հետ ունի ուժի մեջ մտած կիրարկման արձանագրություններ:

Պատգամավոր Գուրգեն Արսենյանի հարցին ի պատասխան՝ Արմեն Ղազարյանը տեղեկացրել է, որ տարեկան կտրվածքով 1000-1200 հետընդունման հայցեր են ստացվում. առաջին տեղում են Գերմանիան, Ֆրանսիան, Չեխիան:

Հարակից զեկույցում հանձնաժողովի անդամ Սարգիս Խանդանյանը գործընկերներին առաջարկել է դրական եզրակացություն ներկայացնել:

Նախաձեռնությունն արժանացել է հանձնաժողովի դրական եզրակացությանը: