Ադամ Շիֆը Պետդեպարտամենտին կոչ է արել աջակցել Հայաստանին և Արցախին

• 06.08.2022, 01:32
•  Ամերիկա,  Աշխարհ,  Հայաստան,  ԼՂՀ

Carlos Jasso/ AP

ԱՄՆ Կոնգրեսի Ներկայացուցիչների պալատի հետախուզության հանձնաժողովի նախագահ Ադամ Շիֆը կոչ է արել Պետդեպարտամենտին`աջակցություն ցուցաբերել Հայաստանի ինքնիշխանությանը եւ Արցախի տարածքային ամբողջականությանը։

«Ես խորապես անհանգստացած եմ Լեռնային Ղարաբաղում, որը հայտնի է նաեւ որպես Արցախ, զոհերի մասին հաղորդագրություններով, որոնք Ադրբեջանի կողմից Հայաստանի հետ հրադադարի պայմանագրի ուղղակի խախտման հետեւանք են»,- իր ֆեյսբուքյան էջում գրել է Շիֆը, փոխանցում է News.am-ը: 

Նա ընդգծել է, որ սա Ադրբեջանի կողմից առաջին անգամ անվրեպ հարձակում անելուց շատ հեռու է, եւ եթե ԱՄՆ-ն անհապաղ միջոցներ չձեռնարկի Ալիեւի ռեժիմին պատասխանատվության ենթարկելու համար, ապա դա վերջին նման միջադեպը չի լինի.

«Դա հրամայական է. որ Պետդեպարտամենտը պետք է օգտագործի իր դիվանագիտական ​​բոլոր ուղիներն ու լծակները`լարվածությունը նվազեցնելու համար եւ ցույց տա Ամերիկայի անսասան աջակցությունը Հայաստանի ինքնիշխանությանն ու Արցախի տարածքային ամբողջականությանը», - գրել է կոնգրեսականը։

Նա նշել է, որ այս եւ նախորդ տարիներին ազգային պաշտպանության ֆինանսավորման մասին օրենքի քննարկման գործընթացում բազմիցս կոչ է արել անհապաղ ազատ արձակել բոլոր հայ ռազմագերիներին եւ գերեվարված խաղաղ բնակիչներին, տրամադրել տասնյակ միլիոնավոր դոլարների մարդասիրական, իսկ Արցախին նաեւ տնտեսական աջակցություն, Ադրբեջանին ԱՄՆ անվտանգության աջակցության ամբողջական արգելք, ինչպես նաեւ խաղաղ գործընթացում ԵԱՀԿ Մինսկի խմբմի շրջանակներում ԱՄՆ մասնակցության վերականգնում:

«Սա ցույց կտա, որ ԱՄՆ ​​կարող է եւ պաշտպանելու է ժողովրդավարությունն ամբողջ աշխարհում: Ես միշտ լինելու եմ Հայաստանի եւ Արցախի ժողովրդի կողքին», - գրել է Ադամ Շիֆը։