Պուտինը Բաքվին ու Երևանին կոչ է արել հետևել հրադադարի ռեժիմին

• 20.09.2022, 18:41
•  ԵԱՏՄ,  Տարածաշրջան,  Աշխարհ,  Հայաստան

Фото: пресс-служба президента РФ

Ռուսաստանը կոչ է անում Բաքվին ու Երևանին պահպանել հրադադարի ռեժիմն ու հետևել  Ռուսաստանի, Ադրբեջանի ու Հայաստանի ղեկավարների եռակողմ հայտարարություններին։ Այս մասին հայտնել է ՌԴ նախագահ Վլադիմիր Պուտինը Կրեմլում դեսպանների հավատարմագրերի հանձնման արարողության ժամանակ, փոխանցում է Panorama.am-ը։ 

Նշենք, որ միջոցառմանը մասնակցել է նաև  Հայաստանի արտակարգ և լիազոր դեսպան Վաղարշակ Հարությունյանը։

«Մեզ մոտ պետությունների միջև ցանկացած կոնֆլիկտային իրավիճակ լուրջ անհանգստություն է պատճառում։ Կոչ ենք անում բոլորին զսպվածություն դրսևորել, խստորեն պահպանել հրադադարի ռեժիմը և հետևել Ռուսաստանի, Ադրբեջանի և Հայաստանի ղեկավարների եռակողմ հայտարարություններին»,- ասել է նա։

Պուտինի խոսքով, «տարածքային վիճելի հարցերի լուծման բանալին մասնագիտական համատեղ աշխատանքի մեջ է՝ Ռուսաստանի խորհրդատվական աջակցությամբ հայ-ադրբեջանական սահմանի սահմանազատման երկկողմ հանձնաժողովի շրջանակներում»։

«Նոյեմբերին Երևանում տեղի է ունենալու ՀԱՊԿ ամենամյա գագաթաժողովը։ Նշեմ, որ կազմակերպությունը միջոցներ է ձեռնարկում հայ-ադրբեջանական սահմանագոտում իրավիճակի սրման հետ կապված։ Առճակատման գոտի է ուղարկվել հատուկ առաքելություն՝ ՀԱՊԿ գլխավոր քարտուղարի ղեկավարությամբ։ Նրան հանձնարարվել է իրավիճակի ուսումնասիրության արդյունքներով առաջարկներ պատրաստել Հավաքական անվտանգության խորհրդի համար»,-ասել է նա։