Շվեյցարիան մտադիր է Ղարաբաղյան կարգավորման նոր ձևաչափ ստեղծել

• 04.07.2016, 23:36
•  Տարածաշրջան,  Աշխարհ,  Հայաստան,  ԼՂՀ

APA

Թբիլիսիում շարունակվում է ԵԱՀԿ խորհրդարանական վեհաժողովի 25-րդ նստաշրջանը, որի շրջանակներում նախօերին՝ հուլիսի 3-ին, կայացել է Վեհաժողովում Շվեյցարիայի, Հայաստանի, Վրաստանի և Ադրբեջանի պատվիրակությունների անդամների հանդիպումը: Հանդիպման նախաձեռնությամբ հանդես է եկել վեհաժողովում Շվեյցարիայի պատվիրակության ղեկավար Ֆիլիպո Լոմբարդին:

Նշվում է, որ հանդիպմանը քննարկվել են կազմակերպչական հարցեր և մոտեցումներ կապված նոյեմբերի կեսերին Շվեյցարայում նշված պատվիրակությունների ներկայացուցիչների մասնակցությամբ սեմինարի անցկացման հետ: Նախատեսվում է, որ սեմինարի ընթացքում խորհրդարանական դիվանագիտության շրջանակում և ազատ մթնոլորտում կքննարկվեն Հարավային Կովկասի կարևորագույն խնդիրները, այդ թվում՝ Ղարաբաղյան հակամարտության կարգավորումը՝ նպատակ ունենալով կողմերի համար ընդունելի դրույթներ գտնել: Հայկական կողմը ողջունել է Շվեյցարիայի այս առաջարկությունը՝ միևնույն ժամանակ ընդգծելով, որ դա չի կարող դիտարկվել որպես բանակցային ձևաչափի փոփոխությանն ուղղված քայլ: «Ցանկացած դիվանագիտական քայլ, այս դեպքում՝ խորհրդարանական դիվանագիտություն, չպետք է վերածվի բանակցային նոր ձևաչափի, այլ նպաստի Մինսկի խմբի համանախագահ երկրների շրջանակում տարվող աշխատանքին»,- հայկական պատվիրակության ղեկավար Արտաշես Գեղամյանի խոսքերը մեջ է բերում news.am-ը: Միևնույն ժամանակ նշվում է, որ շվեյցարական կողմի այս առաջարկության կապակցությամբ հայկական կողմը բարձրացրել է հանդիպմանը ԼՂՀ խորհրդարանի ներկայացուցչի մասնակցության հարցը: Շվեյցարական և վրացական պատվիրակությունները չեն մերժել առաջարկը, սակայն նշել են, որ այդ հարցի քննարկումը հնարավոր կլինի միայն Շվեյցարիայի, Հայաստանի, Վրաստանի և Ադրբեջանի պատվիրակությունների միջև հանդիպումից հետո: Ինչպես Արցախը բանակցային գործընթացի մեջ ներառելու ցանկացած առաջարկի, ադրբեջանական կողմը այս առաջարկին ևս ընդդիմացել է: