Վերաբացվել է Հալեպի ամենամեծ գործվածքի գործարաններից մեկը

• 21.10.2017, 13:27
•  Մերձավոր Արևելք,  Աշխարհ

Риа Новости

Սիրիայի խոշորագույն գործվածքի գործարանը, որը գտնվում է Հալեպում՝ Էին ալ-Տալ շրջանում, հոկտեմբերի 21-ից վերսկսել է իր աշխատանքները, հայտնում է Риа Новости-ն: 

Գործարանի տնօրեն՝ Սալախ Մարդուտը, պատմել է, որ այդ շրջանը մի քանի տարի վերահսկում էր «Ջեբհատ ան-Նուսրա» խմբավորումը, որտեղից նրանք կրակում էին մոտակա բնակելի թաղամասերի ուղղությամբ:

Մինչ պատերազմը ֆաբրիկան արտադրել է բամբակե թելեր:  Արտադրության տարեկան ծավալը կազմել է 14 միլիոն քառակուսի մետր: Հալեպյան հայտնի բամբակի բերք պատերազմից հետո չեն ստացել: 

«Հեռանալով շրջանից՝  գրոհայինները դուրս էին հանել նաև սարքավորումների մի մասը: Վնասը գնահատվում է 60 միլիոն դոլար»,- ասել է գործարանի տնօրենը:

Սալախ Մարդուտը հավելել է, որ միջազգային պատժամիջոցները թույլ չեն տալիս գնել անհրաժեշտ բաղադրիչները, անխափան էլեկտրաէներգիայի մատակարարումն ապահովում են դիզելային գեներատորների օգնությամբ:
 
«Սպիտակեղենի արտադրության համար բամբակե թել  դեռևս բերում ենք Համա նահանգից: Սպիտակեղենի մատակարարման առաջին պայմանագիրը կնքել ենք առողջապահության նախարարության հետ՝ հիվանդների և զինվորական հոսպիտալների համար»,- ասել է նա: