Արա Բաբլոյան. Հայաստանը հանձնառու է շարունակել նպաստել աշխարհում կայունության և անվտանգության ապահովմանը

• 26.03.2018, 15:21
•  Աշխարհ,  Հայաստան

parliament.am

Միջխորհրդարանական միության 138-րդ վեհաժողովի շրջանակում Հայաստանի Հանրապետության Ազգային ժողովի նախագահ Արա Բաբլոյանը Միգրանտների և փախստականների համար ընդհանուր ռեժիմի ամրապնդումը. փաստերի վրա հիմնված արդյունավետ քաղաքական լուծումների անհրաժեշտությունը» թեմայով ելույթ է ունեցել, որը ներկայացվում է ստորև.

«Հարգելի նախագահող,

հարգելի գործընկերներ,

տիկնայք և պարոնայք,

նախևառաջ շնորհակալություն եմ հայտնում այս վեհաժողովի կազմակերպման համար:

Միգրացիայի և փախստականների հարցը բոլորիս հուզող խնդիր է, որը մեր երկրների օրակարգային առաջնահերթություններից է:

Աշխարհը մեկը մյուսի հետևից ցնցում են ճգնաժամերը: Միգրացիայի դրդապատճառները բազմազան են: Այն վերաբերում է ոչ միայն մարդկանց, ովքեր փնտրում են արժանապատիվ աշխատանք և ավելի լավ կենսապայմաններ, այլև այն մարդկանց, որոնք ստիպված են լինում լքել իրենց տները` անվտանգություն և ապահովություն գտնելու հույսով:

Առավել ցավալի է, երբ այս արհավիրքի պատճառ է դառնում պետության վարած քսենոֆոբ բնույթի քաղաքականությունը. երբ անհանդուրժողականություն և ատելություն է սերմանվում քաղաքացիների մեջ:

Մեզ՝ հայերիս քաջ հայտնի են նման քաղաքականության հետևանքները: Անցած դարի սկզբին Օսմանյան կայսրության կողմից իրագործված Ցեղասպանությունից փրկվելու համար միլիոնավոր հայեր լքել են իրենց հայրենիքն ու ապաստան գտել աշխարհի տարբեր երկրներում:

Այսօր, Մերձավոր Արևելքում ստեղծված իրավիճակի հետևանքով ավելի քան 20.000 հայեր Սիրիայից ստիպված եղան գաղթել և ապաստան գտնել Հայաստանում: Մեր երկիրը բնակչության թվի հարաբերակցությամբ երրորդն է Եվրոպայում՝ սիրիացի փախստականներ ընդունող երկրների շարքում: Հայաստանի կառավարության կողմից ձեռնարկվել են բազմաթիվ միջոցառումներ փախստականների կեցության ապահովման և ինտեգրման համար: Սա զգալի թիվ է Հայաստանի նման փոքրաթիվ բնակչություն ունեցող երկրի համար, որը 20-րդ դարի վերջում հարյուր հազարավոր փախստականների էր ընդունել նաև Ադրբեջանից, որտեղ հայերը էթնիկ զտումների են ենթարկվել:

Միգրացիան աշխարհագրորեն սահմանափակված երևույթ չէ: Այն տարածվում է բոլոր մայրցամաքների վրա և վերածվում համընդհանուր մասշտաբներով ողբերգական իրավիճակի:

Առավել ցավալի է, որ այս խնդիրը վերաբերում է երեխաներին՝ ամենախոցելի խմբին, որոնք ենթարկվում են բռնության, բարոյական և հոգեբանական ագրեսիայի: Ամենից առաջ պետք է ապահովվեն երեխայի իրավունքները՝ ունենալ ընտանիք, ապրել առողջ և ապահով միջավայրում, ստանալ կրթություն:

Հարգելի գործընկերներ,

ինչպես ասել է Հռոմի Պապ Ֆրանցիսկոսը՝ «մեր ընդհանուր պատասխանը պետք է արտահայտվի չորս գործողությամբ` ողջունել, պաշտպանել, նպաստել և ինտեգրել»:

Միգրացիայի հետ կապված խնդիրների լուծումներ փնտրելիս առաջին հերթին հարկավոր է անդրադառնալ դրանց պատճառներին: Միջազգային հանրությունը պետք է միասնական լինի ահաբեկչության դեմ պայքարում և հակամարտություններին քաղաքական կարգավորումներ տալու գործում:

Ավելին, հարկավոր են երկարաժամկետ լուծումներ ապահովող ծրագրեր՝ ուղղված խոցված շրջանների զարգացմանը, ինչպես նաև միգրանտների և փախստականների կարգավիճակի ամրապնդմանը: Լավ մտածված ու մշակված քաղաքականությունը կխթանի միգրանտների ինտեգրումը հյուրընկալող հասարակություններում և կնպաստի յուրաքանչյուր անձի ակտիվ մասնակցությանն այդ երկրի զարգացման գործում:

Հայաստանը, հանդիսանալով քաղաքակիրթ հասարակության մաս, հանձնառու է շարունակել նպաստել համամարդկային արժեքների ամրապնդմանը, աշխարհում կայունության և անվտանգության ապահովմանը»: