Չէ, տղերք, այս խելքով լավ կլինի Ղարաբաղի հարցից կիլոմետրերով հեռու մնաք. Աշոտյանը` կառավարության անդամներին

• 13.09.2018, 21:27
•  Աշխարհ,  Հայաստան,  ԼՂՀ

AnalitikaUA

ՀՀԿ փոխնախագահ Արմեն Աշոտյանը ֆեյսբուքյան իր էջում անդրադարձել է համացանցում հայտնված տեսանյութին, որտեղ, իբրև թե, ՀՀ երրորդ նախագահ Սերժ Սարգսյանը խոսել է հող հանձնելուց:

«Թավշիստների ագիտպրոպը երեկվանից մոնտաժել և ինտենսիվ տարածում է նախագահ Սերժ Սարգսյանի հարցազրույցից մի հատված, որտեղ մեզ փորձում է վերագրել "հող հանձնելու" թեման:

Ակնհայտ են դրդապատճառները: Երեկվա հարց ու պատասխանից հետո անգամ, երբ ես վարչապետին առերեսեցի իր օգոստոսյան գնահատականների հետ և նա կրկին հմտորեն խուսափեց պատասխանից, պետք էր մի քարոզչական հնարք, որով սվաղվեր Նիկոլ Փաշինյանի երեկվա մանիպուլյացիաները:

Հիշեցնեմ, որ վարչապետը օգոստոսի 17-ի հանրահավաքում ասաց, որ "դուք ՄԻԱՅՆ հող հանձնելու մասին եք բանակցել":

Եվ ահա, կտրելով Կիսիլյովին տրված հարցազրույցից իրենց ուզած կտորը, այդ վայ-պոլիտտեխնոլոգները շարունակում են մակարոնեղեն կախել իրենց դեռ հավատացող միամիտ մարդկանց ականջներին:

Չէ, տղերք, այս խելքով լավ կլինի դուք վարչապետի PR-ով չզբաղվեք, իսկ Ղարաբաղի հարցից կիլոմետրերով հեռու մնացեք:

Ստորև ներկայացնում եմ հարցազրույցի ամբողջական տարբերակը խնդրից իսկապես հասկացող և մտածող մարդկանց համար»,- գրել է Աշոտյանը: