Չնայած առաջնագծում վիճակը բավական լարված է, սակայն այն կարելի է վերահսկելի համարել. Փաշինյան

• 18.09.2018, 20:45
•  Տարածաշրջան,  Հայաստան,  ԼՂՀ

ՀՀ զինված ուժերը և Պաշտպանութան բանակը վստահորեն վերահսկում են իրավիճակն առաջնագծում։ Այս մասին այսօր՝ սեպտեմբերի 18-ին ֆեյսբուքյան ուղիղ եթերի ժամանակ հայտարարել է ՀՀ վարչապետ Նիկոլ Փաշինյանը` Արցախից Երևան է վերադառնալիս, փոխանցում է News.am-ը: 

Նա հայտնել է, որ Արցախում շատ կարևոր քննարկումներ է ունեցել՝ կապված առաջնագծում իրավիճակի հետ. «Չնայած առաջնագծում վիճակը բավական լարված է, սակայն այն կարելի է կայուն և վերահսկելի համարել։ Համենայն դեպս՝ ՀՀ զինված ուժերը և ՊԲ-ն վստահորեն վերահսկում են իրավիճակը»։

ՀՀ վարչապետը նշել է, որ Արցախի նախագահի և ԶՈՒ ներկայացուցիչների հետ քննարկել է նաև ԼՂ շուրջ ստեղծված ընթացիկ վիճակը. «Մենք պատրաստ ենք խաղաղության և բանակցությունների։ Ես և Արցախի նախագահը պատրաստ ենք խաղաղության, բայց նաև պատրաստ ենք պատերազմի։ Այս վստահությունը հիմնված է մեր Զինված ուժերի և մեր ժողովրդի վստահության վրա»։